İştirakçı ölkələrin birgə səyləri sayəsində BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) çətin danışıqlara baxmayaraq əhəmiyyətli uğurlar əldə edilib.
Bunu Ümumdünya Səhiyyə Təşkilatının (ÜST) baş direktoru Tedros Adhanom Qebreyesus XII Qlobal Bakı Forumunun açılışında çıxışı zamanı bildirib.
"Bakıda yenidən olmaq mənim üçün böyük şərəfdir. Dəvət üçün təşəkkür edirəm. COP29 zamanı burada idim. Hamımız bilirik ki, danışıqlar asan olmadı. Lakin ölkələrin dialoqa və həll yolları axtarmağa hazır olması uğur qazanmağa imkan verdi. Bəli, bu asan deyildi, amma tamamilə mümkün idi", - o qeyd edib.
ÜST-nin rəhbəri qlobal çağırışların həllində çoxtərəfli dialoqun əsas rol oynadığını vurğulayıb. O, həmçinin qeyd edib ki, iqlim dəyişiklikləri təşkilatın aktiv mübarizə apardığı xəstəliklərin yaranmasına və yayılmasına birbaşa təsir edir.
ABŞ-ın ÜST-dən çıxmaq planlarını şərh edən Gebreyesus bunu "yanlış qərar" adlandırıb və bunun səhiyyə sahəsində beynəlxalq səylərə mənfi təsir göstərə biləcəyini bildirib.
Xatırladaq ki, martın 13-15-də Bakıda Nizami Gəncəvi Beynəlxalq Mərkəzinin təşkilatçılığı ilə "Dünya düzəninin yenidən düşünülməsi: Çağırışların fürsətə çevrilməsi” mövzusunda XII Qlobal Bakı Forumu keçirilir. Foruma 400-ə yaxın nüfuzlu siyasətçi, Nobel mükafatı laureatı, alim və ekspert qatılıb. XII Qlobal Bakı Forumunda qlobal aktual problemlər, çoxtərəfli diplomatiya, çoxqütblü dünya nizamı, BMT-nin gələcək paktı, postmünaqişə dövründə bərpa-quruculuq işləri və orta güclərin yeni dünya düzənində rolu kimi vacib mövzular müzakirə olunur.
report
