"Bura sanki komediya filminin çəkiliş meydançasıdır. Absurddur. "İslam", "möminlik", "halallıq" sözlərinin ardı-arası kəsilmir, amma bunları deyən qadınlar yarıçılpaqdır, sanki striptiz ulduzlarıdır".
ABŞ-ın dünyaca məşhur Vice News xəbər saytı bu dəfə Türkiyədə və habelə, Azərbaycanda "Harun Yəhya" kimi tanınan Adnan Oktarla onun "kedicik"lərindən bəhs edən proqram hazırlayıb.
Vice News-un reportyoru Meher Əhməd İstanbulda Adnan Oktarın "iqamətgah"ına baş çəkib və orada başına gələnlərdən şoka düşdüyünü deyib.
"Bütün bunlar zarafatdırmı?" - deyən Meher Əhmədin çəkiliş qrupu Adnan Oktarın iqamətgahının və A9 telekanalının studiyasının olduğu malikanəyə daxil olanda onların kameraları əllərindən alınır. "Təhlükəsizlik məsələləri baxımından kameralarınızdan istifadə edə bilməyəcəksiniz" deyilir. Meher Ehmed ayaqyoluna yollanır, orada mobil telefonu işə salaraq kamera qarşısında deyir: "Burada kameralarımızı əlimizdən aldılar. Onların zibil kameraları ilə işləməli olacağıq".
"Lap yarıçılpaq olsunlar - islam icazə verir"
Studiyadakı "kedicik" adlanan "mömin" gözəlçələrin yarıçılpaq dolaşmaları barədə Adnan Oktara sual verəndə Meher Əhmədin aldığı cavab belə olub: "Əgər ətrafındakı insanları narahat edirsə, müsəlman qadın qapana bilər, çarşab və ya hicabdan yararlanar. Amma kimsəni narahat etmirsə, lap yarıçılpaq olsun. İslam buna icazə verir".
Meher Əhməd reportajında daha sonra deyir: "Mənə Çarlz Darvindən və onun təkamül nəzəriyyəsindən danışdılar. Dedilər ki, Darvin qadın düşməni olub, arvadı ilə köpək kimi davranıb. Bundan sonra studiyada ekskursiya oldu. Yarıçılpaq qadınlar oturduqları yerdə rəqs edirdilər. Həmin qadınların dediklərinə görə, Adnan Oktara heyrandırlar: "Bura müsəlman qadının ola biləcəyi ən yaxşı, ən gözəl yerdir". Görəsən, bu qadınlar əvvəllər harada, necə yaşayıblar ki, belə deyirlər?! Bir tərəfdən üzümə makiyaj çəkirlər, digər tərəfdən də "siyasi islam"dan bəhs edirlər. Mənə azad olduqlarını söylədilər. Axırda da Çarlz Darvinin təkamülünü "alt-üst edən", saxta istinadlar və elm kimi qələmə verilən fırıldıqlarla dolu böyük kitab verdilər".
///
Milli.Az
