Davudoğlu Türkiyənin Suriya məsələsindəki mövqeyinin seçim olmadığını deyib
AZXEBER.COM-un TRT-yə istinadən verdiyi xəbərə görə, xarici işlər naziri Əhməd Davudoğlu Türkiyənin Suriya məsələsinə müdaxiləsinin bir seçim deyil, məcburiyyət olduğunu söyləyib.
"Hadisələrə vaxtında müdaxilə etməsək və bu hadisələr bizim də gələcəyimizə təsir edirsə, o zaman mövqe müəyyənləşdirmək məcburiyyətində qalırıq" deyən nazir hazırda Suriya probleminin diplomatik yolla həlli üçün ən çox səy göstərən ölkənin yenə Türkiyə olduğunu bildirib.
Davudoğlu bu səylər nəticəsində Bəşar Əsadın Kofi Annanın planını qəbul etməyə məcbur olduğunu, Suriyaya diplomatik təzyiq artmayacağı təqdirdə işin qətliamlara qədər gedə biləcəyini qeyd edib. Xarici siyasət idarəsinin rəhbəri Kofi Annanla bu gün danışaraq İran və "Suriyanın Dostları" konfransı ilə bağlı fikirlərini bölüşəcəklərini deyib.
İrandakı görüşlər haqda da məlumat verən Davudoğlu Tehranın belə Əsasın səhvlərini qəbul etdiyini söyləyib. Aprelin 1-də keçiriləcək "Suriyanın dostları" konfransından 4 gün sonra Çinə gedəcəklərini deyən nazir Moskva və Pekinlə danışıqların davam etdirilməli olduğunu vurğulayıb.
