"Suriyaya hər hansı bir hərbi müdaxilə olarsa, bunun qarşılığı olacaq"
ABŞ-ın Suriyanı hərbi əməliyyatlarla təhdid etməsi rəsmi Dəməşqi mövqelərindən bir addım belə olsa geri çəkindirməyib. Suriyada dövlətə məxsus kütləvi informasiya vasitələri ABŞ-ın psixoloji basqıları fonunda Bəşər Əsədə sadiq olan qüvvələri daha inadcıl mübarizə aparmağa həvəsləndirməyə çalışır. Bununla yanaşı Suriya ordusunun üsyançılara qarşı hərbi əməliyyatların miqyası xeyli azalsada, rəsmi şəxslərdə panika müşahidə olunmur. Xüsusi ilə Suriya prezidenti Bəşər Əsəd bu günlərdə fəaliyyətini daha intensivləşdirib. Və xalqla daha çox təmas yaratmağa çalışır. Bu gün etdiyi çıxışda Bəşər Əsəd ABŞ-ın təhdidlərinə eyni tonda cavab verib: “Suriyaya hər hansı bir hərbi müdaxilə olarsa, bunun qarşılığı olacaq”. Müşahidəçilərin fikrincə Bəşər Əsədin əsas təhdid hədəfi İsrail, Türkiyə və İordaniya ictimaiyyətidir. Suriya ordusunun potensialı bu ölkələrə raket zərbələri endirməyə imkan verir. Qeyd edək ki, ABŞ mətbuatının yaydığı məlumata görə, yaxın 3 gün ərzində Suriyaya avia zərbələr endiriləcək.
ANSPRESS
