Milli Məclisdə "Avtomobil nəqliyyatı haqqında” Qanuna dəyişiklik layihəsi müzakirə olunub. Layihəyə əsasən, müntəzəm sərnişindaşıma üçün dayanacaqların müəyyənləşdirilməsi, quraşdırılması və idarə olunması vahid səlahiyyətli qurum tərəfindən həyata keçiriləcək. Bu dəyişiklik bölgələrdə sərnişindaşıma xidmətinin keyfiyyətini artırmaq və ölkə üzrə vahid standartlar tətbiq etmək məqsədi daşıyır.
Nəqliyyat eksperti Aslan Əsədov AZXEBER.COM-a bildirib ki, hazırda taksilərlə bağlı qanunvericilikdə işlər tam yekunlaşmayıb:
"Amma düşünürük ki, bu sahədə əsaslı addımlar atılacaq. Çünki qanunvericilikdə əsasən yükdaşıma və sərnişindaşıma fəaliyyəti təsbit olunub. Onlara dair müəyyən tələblər və qaydalar mövcuddur. Lakin taksilərin konkret harada dayanması, fəaliyyət zonaları və digər praktik məsələlər tam olaraq tənzimlənməyib. Məsələn, avtobuslar üçün xüsusi layihələr var, dayanacaqlar ayrılıb. Amma taksilərlə bağlı belə mexanizm hələlik yoxdur. Bu səbəbdən sərnişinlərin vaxtında düşməsi, taksilərin müəyyən ərazilərdə qısa müddətlik dayanması üçün xüsusi yerlər ayrılmayıb. Bu da müəyyən problemlərə yol açır. Mövcud dayanacaqlar çox azdır, bəzən isə ümumiyyətlə yoxdur.
Xüsusilə də paytaxtın kənar qəsəbələrində, metroların və digər iri infrastruktur obyektlərinin yaxınlığında belə problemlər daha qabarıq görünür. Ümumilikdə isə taksilərlə bağlı vəziyyət hələ də qeyri-müəyyən olaraq qalır”.
Şahanə Ziyad
