Türkiyənin sabiq baş naziri Tansu Çiller “28 fevral hərbi dövlət çevrilişi” istintaqı çərçivəsində prokurorluğa gedərək ifadə verib. Məlumata görə, Çiller sədri olduğu Doğru Yol Partiyası (DYP) və Nəcməddin Ərbakanın sədri olduğu Refah Partiyasının (RP) bu dövrdə ordunun hədəfində olduğunu qeyd edib. İfadəsində prokurorluq əmakdaşlarına “Refah-Yol” hökumətinin ordu tərəfindən istefaya məcbur edilməsi barədə məlumat verən Çiler şikayətçi olmadığını bildirib.Xatırladaq ki, 1997-ci il fevralın 28-də keçirilən Milli Təhlükəsizlik Şurasının (MGK) qərarları o dövrün “Refah-Yol” hökumətinə bildirildi. Qərarda dünyəvi (laik) sistem üçün qərarların icrası tələb olunaraq, “təriqət məktəbləri nəzarətə götürülməli, Təhsil nazirliyinin nəzarətinə verilməli, 8 illik təhsil sisteminə keçilməli, Quran kursları nəzarətə götürülməli, vahid təhsil sistemi icra edilməli, təriqətlər bağlanmalı, irtica səbəbilə ordudan qovulan hərbçiləri müdafiə edən və ordunu din düşməni kimi göstərən mətbuat nəzarətə götürülməli, geyim qanununa riayət edilməli, kəsilmiş qurbanların dəriləri dərnəklərə verilməməli, Atatürkün əleyihndə olan bütün işlər cəzalandırılmalıdır!” – deyilirdi.
