Türkiyənin “Sabah” qəzeti bu gün məşhurlar dünyasının “çıraqla axtarılan” qulluqçusu barədə yazıb. Məlum olub ki, adı Zümrüd olan bu qulluqçu Bakıda məşhur şoumen Mehmet Əli Ərbil tərəfindən kəşf olunub və İstanbula aparılıb.
Bakı səfərlərindən birində təsadüfən M.Ə.Ərbilin köynəyini ütüləyən Zümrüdün səliqəsi və əl işi şoumenin xoşuna gəlib. Sonuncu onu İstanbula dəvət edib. Amma Zümrüdün Türkiyə macərası M.Ə.Ərbillə məhdudlaşmayıb. Daha sonra o, pop ulduz Tarkanın qarderobunu düzəldib və evini təmizləyib. Elə bundan sonra da Zümrüdün adı axtarılan qulluqçular siyahısına düşüb. Məlum olub ki, orta yaşlı bu qadın konkret bir nəfərin evində qulluqçuluq etmir. Sadəcə həftəsinin günlərini müxtəlif məşhurlar arasında “bölüb”. Səliqəsi və “əli, dili təmizliyi” ilə seçilməsi isə onu daha da populyarlaşdırıb. Belə ki, Zümrüdün dilindən çalışdığı evlərin məşhur sahibləri barəsində bir kəlmə də çıxmır.
“Sabah” qəzetinin yazarı Mert Vidinli azərbaycanlı qulluqçu barədə belə yazıb: “Əgər mənim kimi ev işlərindən anlamırsızsa və ya təmizliyə, dağınıqlığı yığışdırmağa vaxtınız yoxdursa, ən böyük probleminiz evə təmizliyə gələcək qadın tapmaqdır. Ütü sənətini tək cizgi ilə icra edən, künc-bucaqda toz qoymayan, qarderobunuzu səliqəyə salan birini tapmağınız çox çətindir. Xüsusən də evinizin hər tərəfində dəyərli əşyalar varsa, əli “uzun” olmayan bir qulluqçu tapmanız şərtdir. Bu günlərdə dostlarımdan biri onu mənə tövsiyə etdi. Məlum oldu ki, telefonları susmur, hamı ona zəng edir. Amma heç də hamının dəvətini qəbul etmir”.
Digər saytlar isə yazıblar ki, İstanbulda normal ailələr bir günlük qulluqçu (onlar buna “gündəlikçi kadın” deyirlər-müəl.) məsrəfi 100 TL-ə (50 AZN) bərabərdir. Yəni, bu, qulluqçunun gün ərzində evdəki bütün işləri (paltar yuma, ütüləmə, evin dib-bucaq təmizlənməsi, qabların yuyulması və s.) görməsi müqabilində verilir. Amma Zümrüdün günlük tarifi 500-700 TL-dir. Bu da onun “sosyete gündəlikçisi” adlandırılması ilə bağlıdır. (musavat.com)
