Ölkəmizdə təhsil infrastrukturunun inkişafı istiqamətində həyata keçirilən layihələr çərçivəsində Sabirabad rayonunun Qalaqayın kəndində yerləşən 528 şagird yerlik tam orta məktəbin tikintisi uğurla başa çatdırılıb.
AZXEBER.COM xəbər verir ki, müasir standartlara cavab verən təhsil müəssisəsi funksionallığı, təhlükəsizliyi və geniş tədris imkanları ilə seçilir. Məktəbin ümumi 31 227 m² ərazisində yaradılan yeni tədris mühitində təhsilin yüksək səviyyədə təşkili üçün bütün zəruri şərait təmin olunub. Məktəbdə 21 sinif otağı, 1 məktəbəqədər hazırlıq otağı, 3 laboratoriya, 2 əmək otağı fəaliyyət göstərir. Şagirdlərin rəqəmsal bacarıqlarının inkişafı üçün 3 informatika kabineti, eləcə də çağırışaqədərki hazırlıq məqsədilə 1 hərbi hazırlıq kabineti istifadəyə verilib.
Təhsil müəssisəsində kitabxana və oxu zalı yaradılıb, şagirdlərin asudə vaxtlarının səmərəli təşkili və məktəbdaxili tədbirlərin keçirilməsi üçün akt zalı istifadəyə hazır vəziyyətə gətirilib. Məktəbdə, həmçinin yeməkxana və müasir idman zalı fəaliyyət göstərir. Məktəbin tikintisi çərçivəsində sosial-inzibati və mühəndis-kommunikasiya infrastrukturu tam şəkildə qurulub, ətraf ərazi abadlaşdırılıb.
Qalaqayın kənd tam orta məktəbinin istifadəyə verilməsi bölgədə şagirdlər üçün müasir, rahat və təhlükəsiz təhsil mühiti yaradaraq tədrisin keyfiyyətinin yüksəldilməsinə mühüm töhfə verir.
