Qulu Məhərrəmli: "Hesab edirəm ki, telekanalların bir-birilə bu şəkildə davası etika ve peşə həmrəyliyi baxımından doğru deyil"
"Cəmiyyətin bu məsələdə çox diqqətli olması lazımdır"
Azərbaycanda bəzi telekanalların timsalında keçmiş işçilərə münasibətdə olduqca qısqanc yanaşma var. Məsələ ondadır ki, hansısa jurnalist telekanalı tərk edib digər telekanala keçirsə, ona olan münasibət kəskin dərəcədə dəyişir.
Necə deyərlər, əvvəlkindən fərqli olaraq, münasibət 180 dərəcə dəyişir. Görürsən ki, onun ünvanına kəskin tənqidlər olur və yaxud da gördüyü işlərin üstündən ümumiyyətlə xətt çəkilir. Hətta vəziyyət o həddə gəlib çatır ki, bunu geniş səviyyədə ictimailəşdirirlər. Bəzən də elə olur ki, telekanaldan gedən aparıcı digər işlədiyi telekanalda səhvə yol verirsə, əvvəl işlədiyi kanal bundan qisasçılıq məqsədilə istifadə edib onu kəskin tənqid hədəfinə çevirir. Bu zaman qarşı tərəf də analoji formada cavab verməyə çalışır və sonda bu, hətta qarşıdurmaya qədər gedib çıxır. Müşahidələr göstərir ki, bəzən bu tənqidlər məcrasından çıxaraq açıq-aşkar qərəzli forma alır. Bir növ bundan məqsədyönlü şəkildə bir-birinə qarşı, yaxud da keçmiş işçiyə qarşı istifadə edirlər. Dəfələrlə belə hallara görə ciddi qalmaqallar yaranıb. Ümumən belə hallar nə dərəcədə doğrudur?
Tanınmış teleaparıcı və media eksperti Qulu Məhərrəmli hesab edir ki, bu düzgün deyil: "Hesab edirəm ki, telekanalların bir-birilə bu şəkildə davası etika ve peşə həmrəyliyi baxımından doğru deyil. Efirdə işlədilən hansısa düşüncəsiz ifadələrə mən də tənqidi münasibətimi bildirmişəm. Belə halları normal məntiqin məhsulu saymıram. Ancaq burada bəzi incəliklər var ki, onu da nəzərə almaq lazımdır. Mən demirəm ki, TV-lərin bu "haqq-hesab çürütmək" manerası manipulyativ addımdır və baş qatır, sadəcə anlatmaq istəyirəm ki, bu gərəksiz efir savaşı ictimaiyyətin diqqətini xalqımız və dövlətimiz üçün xüsusi önəmli olan məsələlərdən uzaqlaşdırır.
Ona görə də cəmiyyətin bu məsələdə çox diqqətli olması lazımdır"./// Baki xeber qəzeti
