Son dövrlər televiziya proqramlarında ər-arvad münasibətləri və ailədaxili münaqişələrin geniş şəkildə nümayiş etdirilməsi, eləcə də boşanma hallarının açıq formada müzakirə olunması cəmiyyətdə müxtəlif reaksiyalara səbəb olub. Mütəxəssislər bildirirlər ki, bu cür yayımlar ailə institutunun dəyərlərinə mənfi təsir göstərir və gənclər arasında boşanmanı "adi hal” kimi təqdim edir.
Psixoloq Nabat Mirzəyeva AZXEBER.COM-a açıqlamasında bildirib ki, televiziyada yayımlanan hər bir veriliş gənclərdə və uşaqlarda dərin psixoloji təsir yaradır:
"Televiziyada yayımlanan ailə və münasibət mövzulu verilişlər ifrat dərəcədə qışqırıq, hay-küy və çirkin formada təqdim olunanda uşaqların və gənclərin düşüncəsində belə fikir formalaşır ki, bu cür vəziyyətlər normaldır. Onlar düşünürlər ki, əgər bu, televiziyada göstərilirsə, demək bu, həyatın adi bir hissəsidir. Beləcə, yanlış təbliğat doğru kimi qəbul olunmağa başlayır.”
Psixoloq qeyd edib ki, sevgi və münasibətlərin ucuz formada təqdim olunması ailə dəyərlərinin dəyərdən düşməsinə səbəb olur:
"Münasibətlərdə səbir, təmkin, anlayış, qarşılıqlı diqqət və sevgi ucuz şəkildə təqdim edildikdə bu, ailə anlayışını mənasızlaşdırır. Gənclər düşünür ki, ailə qurmağa dəyməz. Biz fərqinə varmadan bu düşüncə şüuraltı şəkildə formalaşır.”
Ekspertin sözlərinə görə, boşanmanın təbliği müəyyən mənada azadlıq baxımından müsbət sayılsa da, bu hal gəncləri ani hisslərə yönəldir:
"Gənclər ailə qurur, bir neçə ay və ya il birlikdə yaşayır, sonra münasibət alınmadıqda rahatlıqla ayrılırlar. Bu, onlarda belə fikir formalaşdırır ki, ailə istənilən vaxt tərk edilə bilən bir yerdir.”
Nabat Mirzəyeva əlavə edib ki, bu cür yayımlar nəticəsində boşanma halları cəmiyyətdə "adi hadisə” kimi görünməyə başlayır:
"Televiziyada evliliklərin pozulma səbəbləri bəzən çox bəsit olur. Gənclər bunu gördükdə boşanmanı da normallaşdırır. Halbuki bu, çox ciddi məsələdir. Dərin bağlara, emosional bağlılığa yönəlmək əvəzinə insanlar daha çox dağıtmağa meyllənirlər.”
Psixoloq vurğulayıb ki, televiziya təkcə əyləncə vasitəsi deyil, həm də sosial dəyərlərin formalaşdığı bir məkandır:
"Televiziya cəmiyyətə dəyərləri aşılamaq gücünə malikdir. Əgər gənclər və uşaqlar televiziyada zorakılıqla təqdim olunan münasibətləri görürsə, onlarda "ailə” anlayışı təhlükəsiz və sevgi dolu yer kimi yox, qorxulu və gərgin mühit kimi formalaşır. Əlbəttə, sosial məsələlər televiziyada müzakirə olunmalıdır, amma nə qədər zorakılıq göstərilirsə, bir o qədər də ailənin gözəl tərəfləri göstərilməlidir. Tamaşaçıya izah olunmalıdır ki, ailə – bu deyil.”
Şahanə Ziyad
