“Texnikabank”ın Müşahidə Şurasının sədri Etibar Əliyevin azad olunacağı haqda xəbərlər var. Banka yaxın qaynaqlardan verilən məlumata görə, hazırda E.Əliyevin azad olunması üçün hüquqi məsələlər həll olunur. Qaynağımız E.Əliyevin azad olunacağı günü də deyib - 6 may. Qaynağın iddiasına görə, məhz bu tarixin seçilməsi əbəs deyil: “Texnikabank” faktiki olaraq iflas həddinə gətirilib. Qalıb bu məsələnin yuridik baxımdan həlli. Ona görə də lazımdır ki, səhmdarların ümumi yığıncağını çağırıb Etibar Əliyevin sədrliyi ilə məsələyə hüquqi don geydirilsin. Mayın 7-də keçiriləcək ümumi yığıncaqda “Texnikabank”ın məsələsinə hüquqi don geyindirmək istəyirlər". Qeyd edək ki, “Texnikabank”ın Müşahidə Şurasının sədri E.Əliyevin və bir neçə əməkdaşının həbsi bankı iflas həddinə gətirib. Son məlumatlara görə, bankın müxbir hesabında cəmi 300 min manat pul qalıb. Həbslərə qədər isə bu məbləğ 50-60 milyon manat olub. “Texnikabank”da baş verənlər və bankın bağlanmasının Azərbaycanın bank sektoruna necə təsir göstərməsi ilə bağlı iqtisadçı-ekspert Qadir İbrahimli qəzetimizə açıqlamasında deyib ki, bu bankda baş verənlər ümumilikdə ölkəmizin biznes mühitinə və bank sektoruna böyük zərbədir. İqtisadçı-ekspert “Texnikabank”ın ötən il göstəricilərinə görə Azərbaycan banklarının ilk onluğuna daxil olduğunu qeyd etməklə bankın iflas həddinə çatmasını “biznes mühitində qaydasız oyunların nəticəsi” adlandırıb. Onun dediyinə görə, hakimiyyətdə olan qruplardan biri “Texnikabank”ı zorakı yollarla ələ keçirməsi prosesi sona çatmaq üzrədir.
