Xəbər verdiyimiz kimi, Türkiyənin ən böyük aviadaşıyıcısı olan Türk Hava Yolları Türkiyə ilə Ermənistan arasında müntəzəm reyslər açmağı planlaşdırır.
Şirkətdən verilən məlumata görə, direktorlar şurası bazar şəraitini nəzərə alaraq Ermənistanın İrəvan və Rumıniyanın Timişoara şəhərinə uçuşların başlanmasına qərar verib.
Türkiyə Müdafiə Sənayesi və xarici siyasət analitiki Suat Delgen AZXEBER.COM-a deyib ki, Türkiyə ilə Ermənistan arasında normallaşma prosesi müəyyən mərhələyə çatıb:
"Türkiyə–Ermənistan normallaşma prosesi yeni mərhələyə qədəm qoyub. Bu baxımdan baş verən hadisə əhəmiyyətli addım kimi dəyərləndirilir. Dünən keçirilən Milli Təhlükəsizlik Şurasının iclasında yayılan bəyanatda da bu mövzuya toxunulub.
Bəyanatda bildirilib ki, Ermənistanla aparılan proses müzakirə olunub. Azərbaycan–Naxçıvan arasında maneəsiz nəqliyyatı təmin edəcək xəttin əhəmiyyəti vurğulanıb. Bu xəttin bölgə ölkələrinin maraqlarına xidmət edəcəyi və davamlı sülhə töhfə verəcəyi qeyd olunub”.
Ekspert bildirib ki, Türkiyə normallaşmada əsas diqqəti Azərbaycanla münasibətlərə verir:
"Türkiyə normallaşma apararkən əsas diqqəti Azərbaycan–Naxçıvan koridoruna yönəldir. Türk Hava Yollarının bu istiqamətdə uçuşlara başlaması da təsadüfi deyil. Bu, həm Ermənistan–Azərbaycan sülh prosesinin sona yaxınlaşdığını, həm də Ermənistanın koridorla bağlı müsbət addımlar atmağa hazır olduğunu göstərir. Daha əvvəl bu mövzuda Ermənistanla ABŞ arasında da müəyyən razılaşma əldə olunmuşdu. Bütün bunlar Türkiyə–Ermənistan münasibətlərinin növbəti mərhələyə keçdiyini göstərir”.
Şahanə Ziyad
