Xəbər verdiyimiz kimi, martın 11-də Qazaxıstan Prezidenti Kasım-Jomart Tokayev Azərbaycana işgüzar səfər gəlib.
Qazaxıstan Respublikasının Prezidentini Azərbaycan Respublikasının Prezidenti İlham Əliyev qarşılayıb.
Bu gün isə hər iki dövlət başçısı işğaldan azad edilmiş ərazilərə - Füzuliyə, daha sonra isə Şuşaya səfər ediblər.
Dövlət başçısı İlham Əliyevin Qazaxıstan Prezidentiylə görüşü və iki dövlət arasındakı fəal diplomatik əlaqələrin nəticəsi nəyi göstərir?
Sözügedən görüş dünyaya hansı anonsu verdi?
Məsələ ilə əlaqədar AZXEBER.COM-a danışan Milli Məclisin deputatı Azru Nağıyev bildirib ki, Qazaxıstan Böyük Vətən Müharibəsində Azərbaycana çox ciddi mənəvi, ideoloji dəstək olan qardaş dövlətlərdəndir:
"Məlumdur ki, Qazaxıstan Azərbaycanla çox mühüm strateji əhəmiyyətli tərəfdaş olan qardaş dövlətdir. Qazaxıstan Prezidenti Kasım-Jomart Tokayevin Azərbaycana səfəri eyni zamanda, Azərbaycan Prezidenti cənab İlham Əliyevlə görüşü və bu görüşün nəticəsi olaraq çox vacib sənədlərin imzalanması bir daha bizim həqiqətən də dost, qardaş dövlət olduğumuzu göstərdi. Həmçinin Böyük Vətən Müharibəsində Azərbaycana çox ciddi mənəvi, ideoloji dəstəyi olan dövlətlərdən biri idi. İşğaldan azad olunmuş ərazilərdə uşaq mərkəzinin yaradılması təşəbbüsünün məhz Qazaxıstan tərəfindən təklif olunması çox mühüm əhəmiyyət kəsb edir".
Deputat əlavə edib ki, hər iki ölkənin müsbət inkişaf dinamikasında dövlət şaçılarının xüsusi rolu var:
"İqtisadi məsələlərə gələndə isə Trans-Xəzər nəqliyyat dəhlizinin Qazaxıstan və Azərbaycanla birgə həyata keçirilməsi məsələsi gündəmdədir. Təbii ki, bizim qarşılıqlı fəaliyyətimiz var. Yüzlərlə Azərbaycan şirkəti Qazaxıstanda fəaliyyət göstərir. Qazaxıstan zəngin təbii ehtiyatlara malik olan bir dövlətdir. Bu dövlətdə də Azərbaycanın iqtisadi fəaliyyətinə böyük imkan var və bu istiqamətdə çox strateji addımlar atılır. Bir sözlə, hər iki ölkə arasındakı dostluq münasibətləri davam etdiriləcəkdir. Bu əlaqələrin həm iqtisadi, həm siyasi, həm də digər istiqamətlərdə inkişafı Azərbaycanın müstəqil xarici və daxili siyasətinin təzahürüdür. Düşünürəm ki, bu proseslərdə hər iki dövlətin başçısının bir-birinə olan dostluq münasibətinin də öz rolu var".
Qazaxıstan Prezidentinin Azərbaycana səfərini AZXEBER.COM-a şərh edən politoloq İlyas Hüseynov söyləyib ki, Tokayevin Azərbaycana gəlməsi hər iki ölkə arasında möhkəm və sıx əlaqələrin formalaşdığının göstəricisidir:
"Azərbaycan və Qazaxıstan arasında çox sıx və möhkəm münasibətlər mövcuddur və Qazaxıstan Prezidenti Kasım-Jomart Tokayevin Azərbaycana gəlməsi də bunu göstərir. Xüsusən də Vətən Müharibəsindən sonra Azərbaycanın Mərkəzi Asiya dövlətləri ilə əməkdaşlığı bir qədər də genişlənib, perspektivlər formalaşıb. Mərkəzi Asiya ölkələri yeni geosiyasi reallıqlar kontekstində Qərbə çıxış imkanı əldə edirlər. Orta Dəhliz, Trans-Xəzər boru kəməri, Zəngəzur dəhlizi hazırda müazakirə edilən layihələrdir. Enerji eləcə də nəqliyyat daşıyıcılığında Azərbaycanla Qazaxıstan arasında strateji münasibətlər formalaşıb".
Siyasi şərhçi açıqlamasında qeyd edib ki, Qazaxıstan dəfələrlə Azərbaycanın ərazi bütövlüyünü, suverenliyini, sərhədlərin toxunulmazlığını dilə gətirərək buna tərəfdar çıxıb.
"Xüsusilə vurğulamaq lazımdır ki, yeni geosiyasi reallıqlar kontekstində Qazaxıstan Azərbaycanın yenidənqurma və bərpa işlərinə böyük önəm verir. Bu xüsusda Qarabağda, Füzulidə Qurbanqazı adına uşaq yaradıcılıq və inkişaf mərkəzi də vurğulanmalıdır. Çünki Qazaxıstan Prezidentinin bundan öncə səfəri zamanı bu yaradıcılıq mərkəzinin təməli qoyuldu. Artıq budəfəki səfər çərçivəsində buranın açılşı baş tutdu. Bu da Qazaxıstanın Azərbaycana qələbə müstəvisində verdiyi bir töhfədir. Yaddan çıxartmayaq ki, Qazaxıstan həm də Kollektiv Təhlükəsizlik Müqaviləsi Təşkilatının (KTMT) üzvüdür. Azərbaycanın ərazi bütövlüyünü, suverenliyini, sərhədlərin toxunulmazlığını dəfələrlə söyləyib və buna tərəfdar çıxıb. Bütün bunlara görə də biz Qazaxıstan dövlətinin liderinə və xalqına öz minnətdarlığımızı bildiririk. Ümid edirəm ki, bu səfər ikitərəfli siyasi gündəliyin daha da genişlənməsinə və dərinləşməsinə səbəb olacaq. Ümumilikdə, iqtisadi və ticari sahədə də münasibətlərin inkişaf etdirilməsi üçün çox yaxşı potensial var. Bu səfər həm də iki ölkə arasındakı münasibətlər çərçivəsində yeni səhifənin açılmasına əhəmiyyət yaradacaq".
Mikayıl Mirzəzadə
Yazı Medianın İnkişafı Agentliyinin "Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi" mövzusunda dərc edilib.
