Xəbər verildiyi kimi, Tovuzda orta məktəb şagirdi, 13 yaşlı qız itkin düşüb. Rayonun Bozalqanlı kənd sakini, 2012-ci il təvəllüdlü A.Süleymanova ötən gün axşam saat 18:00 radələrində oxuduğu Bozalqanlı kənd tam orta məktəbindən çıxıb və evə qayıtmayıb.
AZXEBER.COM xəbər verir ki, Bizim.Media itkin düşən qızla bağlı bəzi təfərrüatları Tovuz rayonu Yusif Sadıqov adına Bozalqanlı kənd tam orta ümumtəhsil məktəbindən öyrənib.
Məktəbdən bildirilib ki, yeniyetmə travmalı və bir qədər problemli şagirddir. Dəfələrlə məktəb psixoloqu şagirdlə iş aparıb:
"İtkin düşən qız 7 A sinfinin şagirdidir. Dünən 10-cu dərs saatından sonra gedib. Davamiyyəti hər zaman yaxşı olub, amma oxumağı zəif idi. Bir qədər sözə qulaq asan deyil. Davranışlarında pozğunluq var idi. Müəllimlərə cavab qaytarırdı, bir az çılğın şagird idi. Məktəb psixoloqu məşğul olurdu onunla... Yəni bir sözlə travmalı uşaq idi".
Məktəb rəsmisinin sözlərinə görə yeniyetmənin valideynləri boşanandan sonra qızın davranışlarında daha çox problem hiss olunub:
"Ana-ata boşanandan sonra qız ata babası, nənəsi və əmisi ilə qalırdı. Travmalı olsa da, özünü sevən qızdı. İnşallah sağ-salamat tapılar",- deyə məktəb rəsmisi əlavə edib.
Qeyd edək ki, DİN Gəncə regional qrupunun baş inspektoru Eşqin Qasımov Bizim.Media-ya bildirib ki, hazırda şəxsin yerinin müəyyən edilməsi istiqamətində Tovuz RPŞ-nin əməkdaşları tərəfindən axtarışlar davam etdirilir.
