ABŞ Prezidenti Donald Tramp İranla danışıqların dayandırılmasına göstəriş verib.
CNN-ə danışan yüksək rütbəli ABŞ rəsmilərinin sözlərinə görə, Trampın bu qərarına səbəb İranın danışıqlarda güzəştə getməyə hazır olmamasıdır.
Məlumata görə, ABŞ liderinin kürəkəni və baş müşaviri Jared Küşnerə, vitse-prezident Cey Di Vensə və xüsusi nümayəndə Stiv Uitkoffa İranın nümayəndələri ilə dialoqa girməmək barədə göstəriş verilib.
ABŞ rəsmilərinin CNN-ə bildirdiyinə görə, Ağ Ev İranı "mümkün qədər tez məğlub etmək” cəhdindən də geri çəkilib. Bunun əvəzinə Vaşinqtonun İranı zamanla "boğmaq” strategiyasına üstünlük verdiyi bildirilir.
Bu qərar Trampın bundan əvvəl İranla danışıqların yaxşı getdiyini və yaxın vaxtlarda yeni razılaşmanın əldə edilə biləcəyini dəfələrlə açıqlamasından sonra verilib.
Avqustun 17-də isə "Al Arabiya” telekanalının mənbələri Vaşinqton və Tehran arasında atəşkəs rejiminin daha 60 gün uzadılması ilə bağlı razılığın əldə edildiyini bildirmişdi.
Lakin bundan sonra Tramp "Truth Social” sosial şəbəkəsində İranla hazırda "heç bir danışıqların və ya əlaqələrin aparılmadığını və planlaşdırılmadığını” açıqlayıb.
ABŞ prezidenti həmçinin İran limanlarının dəniz blokadasının davam etdiyini bildirib.
Trampın sözlərinə görə, Hörmüz boğazı minalardan təmizlənib və gəmiçilik üçün açıqdır.
Beləliklə, Vaşinqtonun İranla bağlı strategiyasında yeni mərhələnin başladığı bildirilir. Ağ Ev birbaşa diplomatik danışıqlar əvəzinə Tehran üzərində uzunmüddətli təzyiqin artırılmasına üstünlük verməyi planlaşdırır.
CNN-ə danışan mənbələr Tramp administrasiyasının İranın güzəştə getməsini gözlədiyini və bu baş vermədiyi halda iqtisadi və digər təzyiq vasitələrindən istifadəni davam etdirəcəyini bildiriblər.
///Modern.az///
