Xoşqədəm Hidayətızı,
Əməkdar jurnalist
İki gündür ABŞ-də imzalanan tarixi anlaşma bir kənarda qalıb, biz isə Trampa sual verən jurnalistin ingilis dili səviyyəsi və aksenti ilə məşğuluq.
Tramp o sualı çox yaxşı başa düşdü. Sadəcə, hər zamankı kimi özünəməxsus cavabını verdi.
O jurnalist – Vüsalə Abbasova – illər öncə addımlarını yeni atan gənc bir jurnalist kimi mənim yanıma gəlmişdi. Mənim müəllifi olduğum "Sən Tək Deyilsən” layihəsində TV təcrübəsi olmadan, qısa müddətdə əzmi və çalışqanlığı ilə müxbir, prodüser, montajçı, redaktor oldu.
Mənim kimi tələbkar bir insanın yanında işləyib tərif almaq hər adamın işi deyildi – amma o bacardı.
Daha sonra İstanbul Universitetində həm bakalavr, həm də magistratura təhsilini uğurla tamamladı. Ardınca PhD tələbəsi kimi ABŞ-ın nüfuzlu Yale Universitetinə getdi.
Xatırlayıram, həmin vaxtlar onun üçün çox çətin idi — universitetin tələbə evində qalırdı. Maddi sıxıntılar, çətinliklər.
Hər gün mənə zəng edir, çətinliklərindən danışır, məsləhətlər alırdı. Mən hər zaman onun yanında idim, çünki inanırdım.
Bu inam boşa çıxmadı — o, BMT-dən ardıcıl 2 il təqaüd qazanan tələbə oldu.
BMT Baş katibindən müsahibə alan ilk azərbaycanlı jurnalist, BMT Jurnalistlər Assosiasiyasının da yeganə azərbaycanlı üzvüdür.
Türkiyədə çalışdığı vaxt Ərdoğanın sevimli jurnalistlərindən biri oldu.
Netanyahu, müxtəlif ölkə prezidentləri, baş nazirlər, beynəlxalq təşkilatların təmsilçiləri – onun müsahibə portfelindədir.
Vüsalə məcburi köçkün ailəsində doğulub, bu yerə səs-küysüz, "sponsor” olmadan, "dayı”ların kölgəsində yox, günəşin altında təkbaşına addımlayaraq gəlib. O, bacarıqlı, dürüst və dəyərlərinə bağlıdır. Mənəm-mənəmlikdən, eqodan, ambisiyadan uzaq, yaxşılığı unutmayan, etibarlı, sədaqətli və zəhmətkeş insanların yolu daim açıq olur.
Yolun daim açıq olsun, Vüsalə!
