Elon Musk Tramp barədə etdiyi paylaşımlara görə peşman olduğunu bildirib.
AZXEBER.COM xarici mediaya istinadən xəbər verir ki, ABŞ Prezidenti Donald Tramp ilə münasibətləri gərginləşən milyarder iş adamı Elon Musk-ın yeni siyasi partiya quracağı iddiaları uzun müddət ictimaiyyətin gündəmində olub.
Tərəflər arasında sərt açıqlamalar və qarşılıqlı ittihamlar münasibətlərin daha da soyumasına səbəb olub.
Donald Tramp daha əvvəl verdiyi açıqlamada Musk-ın bəyanatlarının onu məyus etdiyini bildirmiş və "Elon ilə çox yaxşı münasibətimiz vardı, amma indi bu münasibətin yaxşı gedib-getmədiyini bilmirəm. Elon məni böyük məyusluğa uğratdı, halbuki ona çox kömək etmişdim,” – deyə bildirib.
Bu açıqlamalara cavab olaraq Musk, X (əvvəlki Twitter) sosial şəbəkəsində paylaşım edərək, "Əgər mən olmasaydım, Tramp seçkini uduzardı. Demokratlar Nümayəndələr Palatasına nəzarət edərdi və Respublikaçılar Senatda 51-49 üstünlük əldə edərdi,” – deyə yazıb.
Elon Musk həmçinin Trampın daha əvvəl ABŞ-nin dövlət borcu ilə bağlı paylaşdığı paylaşımlara istinad edərək, "Bu adam bu gün haradadır?” və "Böyük Çirkin Qanun büdcə kəsirini 2,5 trilyon dollar daha artıracaq!” kimi fikirlər səsləndirib.
Lakin son açıqlamasında Elon Musk münasibətləri bir qədər yumşaltmağa çalışaraq peşmanlıq mesajı verib. O, "Keçən həftə ABŞ Prezidenti Donald Tramp haqqında etdiyim bəzi paylaşımlardan peşmanam. Həddindən artıq irəli getdim,” – deyə bildirib.
Oksana
