Xəbər verdiyimiz kimi, 27 noyabr 2025-ci il tarixində Türk Dövlətləri Təşkilatına üzv olan ölkələrin media və kommunikasiya sahəsində əməkdaşlığını möhkəmləndirmək məqsədilə Türk Dövlətləri Təşkilatının Media Forumu keçirilib. Forum çərçivəsində üzv və müşahidəçi ölkələrin media nümayəndələri bir araya gələrək informasiya mübadiləsi, media əməkdaşlığının inkişafı, dezinformasiya ilə mübarizə və ortaq media layihələrinin hazırlanması məsələlərini müzakirə ediblər.
Milli Məclisin deputatı Tahir Rzayev mövzu ilə bağlı AZXEBER.COM-a açıqlamasımda deyib ki, son illər Türk Dövlətləri Təşkilatının fəaliyyəti xeyli genişlənib:
"Türk Dövlətləri Təşkilatının fəaliyyəti xeyli genişlənib. Bir çox təşkilati tədbirlər həyata keçirilib və bu ölkələrin daimi görüşləri, forumlar və sammitlər türk dilli dövlətlərin daha sıx əməkdaşlığına, əlaqələrin möhkəmlənməsinə zəmin yaradır. Türkiyə Prezidenti cənab Rəcəb Tayyib Ərdoğan və Azərbaycan Prezidenti cənab İlham Əliyev tərəfindən təməli qoyulan və təşkilatlandırılan Türk Dövlətləri Təşkilatı bu gün böyük gücə və vahid bir orqana çevrilməkdədir”.
Parlamentari qeyd edib ki,TDT-nin məqsədi aydındır:
"Bu, yalnız bir təşkilat və ya blok çərçivəsində birləşmək məqsədi daşımır. Təşkilatın əsas məqsədi Türk dövlətləri arasında iqtisadi əməkdaşlığı gücləndirmək, müxtəlif tədbirlərin təşkilində iştirak etmək və ölkələrin milli maraqlarının qorunmasına xidmət etməkdir. Türk Dövlətləri Təşkilatına daxil olan ölkələrin qeyri-hökumət təşkilatlarının keçirdiyi forum bir daha göstərdi ki, bütün sahələrdə bu birliyin möhkəmlənməsi və normal əməkdaşlığın inkişafı təmin olunmaqdadır”.
Deputat bildirib ki, TDT-nin media forumunun keçirilməsi də məhz birlik məqsədinə yönəldilib:
"Türk Dövlətləri Təşkilatının media forumunun keçirilməsi də məhz birlik məqsədinə yönəldilib. Çünki əlaqələrin genişləndirilməsi, vahid platformadan çıxış etmək, əlaqələri yaxşılaşdırmaq və informasiya mübadiləsini genişləndirmək bu gün üçün çox önəmlidir. Ona görə də belə bir forumun keçirilməsi sözsüz ki, Türk dövlətlərinin birliyinin daha yüksək səviyyədə təmin olunmasına yönəldilib və bu, təqdirəlayiq bir haldır. Türk dövlətlərinin birliyini bu gün yalnız siyasi, iqtisadi və humanitar məsələlər deyil, həm də informasiya sahəsində mübadilələrin genişləndirilməsi tələb edir”.
Şahanə Ziyad
