Türkiyənin "Göztəpə" klubu Azərbaycanın "Zirə" komandası ilə Boluda yoxlama oyunu keçirib.
Görüş 1:1 hesabı ilə başa çatıb. Hesabı 11-ci dəqiqədə Elvin Məmmədov açsa da, Tayfur Bingöl 55-ci dəqiqədə oyuna tarazlıq gətirib.
Hər 2 komandanın baş məşqçisi oyundan sonra bu fikirləri çatdırıb.
Okan Buruk: "Zirə" ilə matçda istədiyimiz nəticəni ala bilməsək də, oyunçularımın istəyi, arzusu, meydança içərisindəki göstərdiyi oyunu mənə razı saldı. Bundan sonrakı matçlarda oyunumuzu inkişaf etdirib, çempionata daha hazır olmağa çalışacağıq. Çempionatdakı rəqiblərdən "Boluspor"la oynayacağımız matç bizim üçün yaxşı bir ölçü olacaq. Yavaş-yavaş öz oyunumuzu tapırıq. Komandamız yeni qurulur. Oyunçular bir-birini tanımaq mərhələsini tamamladı. Birlikdə hərəkət etmələri, məşq və matçda göstərdikləri oyun məni ümidləndirir".
Adil Şükürov: “Yaxşı komplektləşmiş komandaya qarşı oynadıq. “Göztəpə”nin özünəməxsus oyun üslubu olsa da, biz də öz oyunumuzu diqtə etməyə çalışdıq. Bəzi epizodlarda bu alınırdı. Ancaq yetərli səviyyədə olmadı. Oyunun əvvəlində yaxşı oynadıq. Ancaq qoldan sonra rəqib daha üstün idi. Yay hazırlığını səmərəli keçirdiyimizi düşünürəm. Türkiyə toplanışını da yüksək səviyyədə keçirdik. Bununla belə komanda hələ tam hazır deyil. Taktiki cəhətdən işlərimiz çoxdur. Çempionatın gedişində istədiyimiz səviyyəyə çatacağımızı düşünürəm”.
Yeri gəlmişkən, bu matçda iştirak etmiş İzmir klubunun yeni transferi Tanju Kayhan gecə yarısı sancılanıb. 27 yaşlı Avstriya doğumlu cinah müdafiəçisi təcili xəstəxanaya aparılıb. Onu kor bağırsağından əməliyyat ediblər. Vaxtı ilə "Beşiktaş"da da oynamış futbolçu artıq xəstəxanadan çıxarılıb. O, 3 həftə sonra məşqlərə başlaya biləcək.
///
