Ötən gün Ermənistanın Baş naziri Nikol Paşinyan keçirdiyi mətbuat konfransında Türkiyə Respublikası ilə bağlı diqqətçəkən açıqlama verib.
Onun fikirlərinə görə, əgər Ermənistan Türkiyə ilə barışığa getməsə, heç bir alternativ qalmayacaq.
Bəs, Paşinyanın indiki hadisələr fonunda bu cür açıqlama verməsi nəyə işarə edir?
Həqiqətən Ermənistan Türkiyə ilə dostluq münasibətlərini yenidən qurmaq niyyətinə düşüb?
Məsələ ilə əlaqədar AZXEBER.COM-a açıqlama verən Milli Məclisin deputatı Hikmət Babaoğli bildirib ki, Paşinyanın səsləndirdiyi fikirləri bugünkü reallıqdır:
"Paşinyanın Türkiyə ilə bağlı səsləndirdiyi fikirlər bugünkü real gerçəkliklərdir. Doğrudan da bu gün nəinki Türkiyə ilə həmsərhəd olan ölkələr, hətta uzaqda olan ölkələr belə Türkiyənin maraqlarını nəzərə almadan xarici siyasət balansını düzgün təyin edə bilməzlər. Son dövrlərdə baş verən müharibələr kontekstində bir daha bəlli oldu ki, Türkiyə həm NATO müttəfiqləri, həm Qərb üçün, həm Yaxın Şərq, Şimali Qafqaz, daha doğrusu Cənubi Şərqi Asiya, Mərkəzi Asiya ölkələri üçün nə qədər böyük əhəmiyyət daşıyan bir ölkədir.
Deputatın fikirlərinə görə, Türkiyə bu gün regionda əsas gücdür və heç bir regional ölkə ona qarşı siyasi ittifaq formalaşdıra bilməz:
"Nəticə etibarilə, Türkiyə bu gün gücdür və Ermənistan kimi kiçik bir dövlətin bu reallığı nəzərə almadan xarici siyasət konsepsiyasını müəyyənləşdirməsi sadəcə ağılsızlıq olar. Məhz Paşinyan da bunu deməyə çalışır. Yəni, Türkiyə reallığını nəzərə almadan şübhəsiz ki, heç bir region ölkəsi düzgün siyasi balans yarada və yaxud Türkiyənin əleyhinə hansısa mərkəz, ittifaq formalaşdıra bilməz. Ona görə də bu, obyektiv reallığın düzgün dərk edilməsidir və ümid edirik ki, elə Paşinyan bu fikirləri sadəcə söz xatirinə səsləndirməyəcək. Real addımlarda da bu gerçəkliyi nəzərə alacaqdır. Səmimi dostluq münasibətlərinə gəldikdə isə əlbəttə ki, heç vaxt Ermənistan regionda səmimi aktor olmayacaq və heç vaxt sadə əməkdaşlıq, inteqrasiya maraqlarından çıxış etməyəcək. Çünki erməni xisləti həmişə qonşunun dar, zəif günündə ona xəyanət etməkdən ibarətdir".
Parlamentari əlavə edib ki, Türkiyə Ermənistanla elə münasibətlər saxlamalıdır ki, sonradan Ermənistan öz xisləti ortaya qoyub asanlıqla xəyanət etməsin:
"Biz də bu reallığı nəzərə almalıyıq. Türkiyə də, Azərbaycan da ermənilərlə elə münasibət saxlamalıdır ki, nə vaxtsa o münasibətlər bizim əleyhimizə çevrilməsin. Çünki ilk fürsətdə böyük Osmanlı İmperiyasına xəyanət etmiş erməni xisləti Türkiyə Cümhuriyyətinə də çox asanlıqla xəyanət edə bilər və fürsət düşərsə mütləq bunu edəcək. Məsələnin mahiyyəti də tam bundan ibarətdir".
Mikayıl Mirzəzadə
