Türkiyədə keçirilən yarış zamanı bıçaqlanan idmançı Araz Musayev məhkəmədə hazırda Azərbaycan Muaytay-Tayboks Federasiyasının faktiki prezidenti olan Azər Həsənsoya uduzub.
AZXEBER.COM xəbər verir ki, bunu Oxu.Az-a açıqlamasında gənclərdən ibarət uşu millisinin baş məşqçisi Elçin Eminov deyib.
O bildirib ki, 2024-cü ilin noyabrında federasiyada növbədənkənar prezident seçkisi olub və Azər Həsənsoy qalib gəlib. 2022-ci ildən federasiya prezidenti olan Araz Musayev bu qərarla razılaşmadığı üçün məhkəməyə üz tutub.
Məhkəmə Azər Həsənsoyun Azərbaycan Muaytay-Tayboks Federasiyasına yenidən prezident seçilməsini tam qanuni və düzgün hesab edib. Proses bu il iyulun 9-da baş tutub.
Qərarda qeyd edilib ki, Azər Həsənsoy Azərbaycan Döyüş Federasiyaları Assosiasiyasının, Azərbaycan Muaytay-Tayboks Federasiyasının və Azərbaycan Uşu Federasiyasının təsisçisi və prezidentidir.
O, həmçinin uşu və muaytay üzrə Azərbaycan milli komandalarının baş məşqçisi kimi də fəaliyyət göstərir. 1992-ci ildə Şərq Döyüş Sənətləri Federasiyasını təsis edən Həsənsoy, 1996-cı ildə beynəlxalq tələblərə uyğun olaraq ayrıca Muaytay Federasiyasını qurmuş və o vaxtdan etibarən federasiyaya rəhbərlik edir.
Xatırladaq ki, A.Musayev Türkiyədəki hadisədən sonra verdiyi açıqlamalarda özünü federasiya prezidenti kimi təqdim edib.
