"Təşəkkür edirəm, mənə hədiyyə gərək deyil. Gəlin balaca Noks üçün birlikdə dua edək! Tanrı bizi eşitsin..."
4 yaşlı Prestin Barnett ona hədiyyə vermək istəyən Santa-Klausun qarşısında diz çökərək başını aşağı salıb.
Prestin ABŞ-ın Cənubi Karolina ştatındakı Kolumbiya şəhərində yaşayır.
Kolumbiya şəhərindəki "Dutch Square" ticarət mərkəzində baş vermiş bu olayın fotosu sosial şəbəkələrdə yayılandan sonra balaca Prestin ölkənin ən məşhur uşağına çevrilib.
2 aylıq körpə Noks Stayn Las-Veqasdakı "Sunrise" uşaq hospitalında, reanimasiya bölməsindədir. Həkimlər onun həyatı uğrunda mübarizə aparırlar.
Noks barədə Prestinə xalası Loren Şarp danışıb: "Televizorda Noksla bağlı süjeti göstərəndə Prestin yanımda əyləşmişdi. Diqqətlə baxdı, sonra suallar verdi. Ona Noks barədə danışdım. Prestin kövrəldi, "Ona yardım edə bilərik?!" soruşdu. Bax, onda mən kövrəldim".
Daha sonra Noks barədə Prestinə nənəsi danışıb. Sən demə, Prestinin nənəsi Facebook-da körpə Noksa yardım məqsədilə yaradılmış qrupa qatılıbmış.
Noks Staynın ilkin müayinəsindən sonra həkimlər onun beyninin "ölməyə" başladığını demişdilər. Təkrar müayinə Noksun beynində qanaxma olduğunu göstərib.
Santa-Klausun qarşısında diz çöküb başını aşağı salan, Noks üçün dua edən Prestinin fotosunu Noksun anası Mindi Stayn görəndə göz yaşlarını saxlaya bilməyib.
///milli.az
