Uzun müddət oturmaq təkcə fiziki sağlamlığa deyil, beyin quruluşuna da mənfi təsir göstərir.
AZXEBER.COM xarici mətbuata istinadən xəbər verir ki, bu barədə ABŞ-də aparılan araşdırmada bildirilib.
Vanderbilt Universiteti, Pittsburq Universiteti və Seul Universitetinin alimləri tərəfindən aparılan araşdırma, 50 və daha yuxarı yaşda olan insanlarda oturma ilə beyin sağlamlığı arasındakı əlaqəni araşdırıb.
Araşdırmada qeyd edilib ki, oturaq həyat tərzi demans növləri, xüsusilə də Alzheimer xəstəliyi ilə əlaqələndirilə bilər. Mütəxəssislər tək idman etməyin kifayət etmədiyini, oturmağa sərf olunan vaxtın da azaldılması lazım olduğunu bildiriblər.
Tədqiqatda yaşı 50-dən yuxarı olan 404 könüllü bir həftə ərzində taxılan sensorlarla izlənilib. İştirakçıların 87 faizi tövsiyə olunan həftəlik ən azı 150 dəqiqəlik məşq müddətinə əməl edib. Bununla belə, gün ərzində daha uzun müddət oturanlarda beyin həcminin azalması və koqnitiv geriləmə əlamətləri aşkar edilib.
Xüsusilə yaddaşla əlaqəli olan hipokampus bölgəsində incəlmə müşahidə olunub. Bu bölgənin Alzheimer xəstəliyindən təsirlənən ilk beyin bölgələrindən biri olduğu bilinir.
Araşdırmaya görə, oturma vaxtı ilə beyin sağlamlığı arasında birbaşa səbəb-nəticə əlaqəsi qurulmasa da, hərəkətsizliyin artması ilə beyində yaşlanma prosesinin daha sürətli irəlilədiyi müşahidə edilib. Bu əlaqənin genetik olaraq Alzheimer xəstəliyinə meylli şəxslərdə daha da güclü olduğu aşkar edilmişdir.
Vanderbilt Universiteti Tibb Mərkəzindən Dr. Angela Jefferson izah edib: "Xüsusilə genetik riski olan şəxslərdə gün ərzində oturmağa tez-tez fasilə vermək beyin sağlamlıq üçün çox vacibdir”.
Oksana
