Koronavirusun "Britaniya” ştammının bir çox ölkədə sürətlə yayılması narahatlığı artırıb. Yeni növ virusun qarşısının alınması üçün görülən tədbirlər hələ ki, effekt vermir. İndi çoxlarını düşündürən sual vaksinasiyanın "Britaniya” ştammından qoruyub-qorumamasıdır.
AZXEBER.COM bu suala cavab tapmaq üçün tibb üzrə fəlsəfə doktoru, infeksionist Vüqar Cavadzadəyə müraciət edib.
Onun sözlərinə görə, peyvəndin "Britaniya” ştammına qarşı nə dərəcədə effektiv olması sübut olunmamışdır: "Bununla bağlı hər hansı elmi tədqiqat işi ortada yoxdur, bu, sübut olunmayıb. Amma hər halda vaksindən istifadə yeni növ virusun qarşısının alınmasında da öz təsirini göstərəcək. Çünki yeni növ virusun əvvəlki ilə oxşarlığı çoxdur, sadəcə bəzi protein zülallarının quruluşunda fərqlər var.”
Azərbaycanda istifadə olunan vaksindən də danışan Vüqar Cavadzadə yeni növ virusa ölkəmizdə də rast gəlindiyi halda onun qarşısının alınmasında müəyyən köməklik göstərə biləcəyini dedi: "Azərbaycanda yeni növ virusa rast gəlinərsə, istifadə olunan peyvənd də onunla mübarizədə kömək göstərə bilər. Amma yenə qeyd edim ki, bu barədə bağlı heç bir elmi araşdırma yoxdur”.
