Uşaq danışmağı, yeriməyi öyrəndiyi kimi, qadın və kişinin ailədəki rolunu da ilk dəfə məhz evində gördüklərindən öyrənir.
Ata ilə ana arasında qurulan münasibət, bir-birinə göstərilən hörmət, fikir ayrılıqlarının necə həll edilməsi və evdə qərarların hansı şəkildə verilməsi uşağın gələcək düşüncə tərzinə görünmədən təsir göstərir.
AZXEBER.COM xəbər verir ki, psixoloqların fikrincə, ailədaxili münasibətlər uşağın xarakterinin, ailə modelinə baxışının və gələcəkdə insanlarla ünsiyyət qurma tərzinin formalaşmasında həlledici rol oynayır. Valideynlər bəzən övladlarının yanında yaşanan mübahisələrin və ya bir-birlərinə qarşı nümayiş etdirdikləri davranışların uşağa təsir etmədiyini düşünsələr də, mütəxəssislər bunun əksini deyirlər. Uşaqlar eşitdiklərindən daha çox gördüklərini mənimsəyir və bu davranışları şüuraltı şəkildə normal həyat modeli kimi qəbul edirlər.
Mütəxəssislərin sözlərinə görə, ailədə bütün qərarların yalnız bir valideyn tərəfindən verilməsi, digərinin fikirlərinin davamlı şəkildə nəzərə alınmaması və ya susdurulması uşağın qadın və kişi rolları barədə yanlış təsəvvür formalaşdırmasına səbəb ola bilər. Belə mühitdə böyüyən oğlan uşağı hökmranlığı təbii hesab edə, qız uşağı isə öz fikrini ifadə etməməyi və haqsızlığa dözməyi normal davranış kimi qəbul edə bilər.
Araşdırmalar göstərir ki, uşaqların psixoloji inkişafına təkcə fiziki zorakılıq deyil, davamlı psixoloji təzyiq, alçaldıcı ifadələr, hörmətsiz münasibət və emosional
soyuqluq da ciddi mənfi təsir göstərir. Çünki uşaqlar valideynlərinin dediklərini deyil, bir-birlərinə necə davrandıqlarını yadda saxlayır və gələcək münasibətlərində çox vaxt həmin davranış modelini təkrarlayırlar.
Psixoloqlar vurğulayırlar ki, uşaqlar valideynlərinin qüsursuz olmasını gözləmir. Əsas məsələ fikir ayrılıqları zamanı qarşılıqlı hörmətin qorunması, sağlam ünsiyyətin qurulması və problemlərin aqressiyasız şəkildə həll edilməsidir. Çünki uşaq üçün ailə sadəcə yaşadığı məkan deyil. Ailə onun gələcək həyatının, quracağı münasibətlərin və yaradacağı ailənin ilk nümunəsidir. Bu nümunə isə illər keçsə də, onun seçimlərində, davranışlarında və övladlarına münasibətində öz izini saxlayır.
Fəridə Əsədzadə
