Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin (RYTN) həbsdə olan yüksək rütbəli məmurlarının məhkəməsi başlayıb.
Məhkəmədə mənimsəmədə və vəzifə səlahiyyətlərindən sui-istifadə etməkdə təqsirləndirilən nazirliyin sabiq Aparat rəhbəri Vidadi Zeynalov, "Aztelekom" MMC-nin sabiq baş direktoru Məhəmməd Məmmədov, "Bakı Telefon Rabitəsi" İstehsalat Birliyinin sabiq rəhbəri Beytulla Hüseynov, "Bakı Telefon Rabitəsi" İstehsalat Birliyinin baş mühasibi Anar Mustafayev, "AzİnTelekom" MMC-nin sabiq baş direktoru Cəlil Cəfərov, "Azərpoçt" MMC-nin sabiq baş direktoru Qəmbər Bəybalayev, "Optik Rabitə, Tikinti və Quraşdırma" MMC-nin baş mühasibi Səhrab Hümbətov, həmçinin Emin Məmmədov, "Bakı Rabitə Təmir Tikinti" və "Təmir Təchizat Servis" MMC-lərinin direktoru Bayram Vəliyev, "Optik Qurğular" İdarəsinin rəisi Namazəli Məmmədov və "Aztelekom" MMC-nin baş mühasibi Oktay Rüstəmov mühakimə olunurlar.
Hakim Əfqan Hacıyevin sədrliyi ilə keçirilən prosesdə cinayət işi üzrə məhkəmənin hazırlıq iclası başlayıb.
Prosesdə təqsirləndirilən şəxslərin anket məlumatları dəqiqləşdirilib. Təqsirləndirilən şəxslər özləri haqqında məlumatları təsdiq ediblər. Sonra təqsirləndirilən şəxs V.Zeynalovun vəkili Elxan Süleymanov vəsatət qaldırıb. Vəkil bildirib ki, o, cinayət işinin materialları ilə tanış ola bilməyib. Müdafiəçi məhkəmədən vəkillərin cinayət işinin materialları ilə tanış olmaq üçün vaxt istəyib. Vəsatət təmin olunub və iş üzrə məhkəmənin hazırlıq iclası noyabrın 16-na təyin olunub.
///Trend
