Serbiya Prezidenti Aleksandr Vuçiç qarşıdakı prezident seçkilərinə qatılmayacaq, amma siyasi fəaliyyətini davam etdirəcək.
AZXEBER.COM Teleqraf-a istinadən xəbər verir ki, bunu Serbiyanın keçmiş baş nazirinin müavini Aleksandr Vulin TASS-a deyib.
"Xeyr. Konstitusiyamız yalnız iki müddətə prezident olmağa imkan verir. O, heç vaxt Konstitusiyanı pozmur və ya buna bənzər şey etmir. Ona görə də, xeyr.
Amma mən tam əminəm: Prezident Vuçiç Serbiyanın yeni siyasi həyatında qalacaq, siyasətlə məşğul olmağa davam edəcək”, - o, Vuçiçin istefasının onun yenidən namizədliyini irəli sürmək niyyətini göstərib-göstərməməsi ilə bağlı suala cavab verərkən bildirib.
Vulin əlavə edib ki, Vuçiç hələ də çox vacib oyunçu olaraq qalır, onun rolu hələ bitməyib: "Amma artıq Serbiyanın prezidenti olmayacaq”.
Xatırladaq ki, Aleksandr Vuçiç bundan əvvəl səlahiyyət müddətinin bitməsinə yaxınlaşdığı üçün istefa verə biləcəyini açıqlamışdı. O, ilk dəfə 2017-ci ildə Serbiya prezidenti seçilib, 2022-ci ildə ikinci müddətə yenidən seçilib. Onun prezidentlik müddəti 2027-ci ildə başa çatır.
