İnternet siqnalını artırmaq üçün Wi-Fi routerlərin arxasına alüminium folqa qoyulması üsulu alimlər tərəfindən laboratoriya şəraitində sınaqdan keçirilib. ABŞ-nin "Dartmouth College" mütəxəssislərinin araşdırması bu üsulla bağlı maraqlı faktları ortaya çıxarıb.
Araşdırma komandasının rəhbəri dosent Şia Jou bildirib ki, xüsusi proqramla mənzilin quruluşuna uyğun hesablanmış və üzəri alüminium folqa ilə örtülmüş yansıtıcılar:
Wi-Fi siqnalının gücünü hədəflənən istiqamətdə 50% artırır.
İstənməyən sahələrə siqnal sızmasını 75% azaldır.
Bu sistem necə işləyir?
Standart router antenaları siqnalı hər tərəfə bərabər yayır. Antenanın arxasına qoyulan metal səth radio dalğalarını əks etdirərək arxaya gedən enerjini tutub ön tərəfə yönəldir. Lakin bu üsul cihazın ümumi gücünü artırmır, sadəcə mövcud enerjini tək bir nöqtəyə toplayır.
Alimlər xəbərdarlıq edir ki, laboratoriyadakı kimi dəqiq formalı qəliblər əvəzinə evdə əllə bükülən folqalar və ya içki qutuları eyni effekti vermir:
Ev şəraitində adətən siqnal artımı cəmi 10% - 20% arasında qalır.
Routerin üzərini tamamilə folqa ilə örtmək cihazın qızmasına və sıradan çıxmasına səbəb ola bilər.
Beton divarlar və böyük metal əşyalar olan evlərdə bu üsul kifayət qədər təsirli olmur.
Folqa üsulu müvəqqəti kömək etsə də, mütəxəssislər siqnalı gücləndirmək üçün müasir "Mesh" sistemləri, "beamforming" dəstəkli routerlər və ya siqnal genişləndiricilərindən (repeater) istifadə etməyi məsləhət görürlər.
///milli.az///
