Xalq artisti qəzəbləndi: "Hər kəs öz işi ilə məşğul olsun!"
ŞOU-BİZNES
18:08 07.12.2011
1239
"Şöhrət" ordenli xalq artistimiz Mənsum İbrahimovun səbri tükənib. Danışmağı sevməyən, sözünü hər zaman sənəti ilə səhnədən deyən xanəndəmiz bu dəfə danışmağa qərar verib. Adətən təmkinli gördüyümüz səhnəmizin Məcnunu onu özündən çıxaran məqamlardan ANS PRESS-ə danışıb: "Əvvəla onu deyim ki, məni narahat edən bir məsələ var və hesab edirəm bu, çoxlarını narahat edir. İstər musiqidə, istər jurnalistikada qeyri-peşəkarlar musiqimizin üzərinə çox gəlirlər. Musiqimizi peşəkarcasına müzakirə etməyə çalışırlar. Peşəkar musiqiçi kimi öz fikirlərini bildirirlər. Peşəkar olmayan kəs tamaşaçı kimi zövqünü deyə bilər. Məsələn, filankəs mənim xoşuma gəlmir, filankəs məni qane etmir, mən filankəsi dinləmirəm. Vəssalam! Jurnalist hökm verir ki, filankəs birincidir, filankəs axırıncıdır. Belə olmaz axı. Bəlkə o jurnalistin 1-ci hesab etdiyi müğənni başqaları üçün heç kimdir? Və yaxud da əksinə. Mən özüm 30 ildir sənətdəyəm, “birdən səhv edərəm” deyə, hökm verməyə çətinlik çəkirəm. Neçə illərdir muğam festivallarında münsiflər heyətinin üzvüyəm. Münsif olmaq ədalətli hakim olmaq deməkdir. Burada bütün şəxsi iddialar, ambisiyalar hamısı kənarda qalmalıdır. Hər kəsin öz qiyməti verilməlidir. Həmişə çalışmışam səbrlə, soyuqqanlıqla ifaları dinləyim və kimə isə münasibətimdən asılı olmayaraq düzgün qərar verim. Amma çox təəssüflər olsun ki, bu gün qeyri-peşəkarlar daha çox qərar verirlər". Sevilən xanəndəmizi daha çox əsəbiləşdirən musiqidən anlayışı olmayanların peşəkar sənətkarlar haqqında fikir bildirməsidir: "Bizim özümüzə fikir bildirirlər, niyə filan şey belə oldu, niyə filan şey belə olmadı? Hər kəs öz işi ilə məşğul olsun! Mən jurnalistika işinə necə qarışa bilərəm? O peşənin öz elmi var. Həkimin, polisin və yaxud da başqa peşə sahibinin işinə qarışmaq olar? Yox. Amma çox təəssüf ki, musiqiyə hamı qarışır, hamı müdaxilə edir. Bu qəbulolunmazdır!"
