5 dekabr 2024-cü il tarixində Azərbaycan Respublikasının Tacikistan Respublikasındakı Səfirliyi tərəfindən Düşənbə şəhərində yerləşən "Vətən” kinoteatrında Zəfər Gününə həsr olunmuş silsilə tədbirlər çərçivəsində, isveçli fotoqraf və rejissor Mikael Silkeberqin Azərbaycan mədəniyyətinin incisi olan Şuşa şəhərinə həsr olunmuş "Xarı Bülbül” sənədli filmi nümayiş olunmuş və rəsmi ziyafətlə davam edib.
Sözügedən sənədli film Azərbaycan Respublikasının Tacikistandakı Səfirliyinin dəstəyi ilə rus dilinə tərcümə edilmiş (ingilis dili altyazı ilə) və səsləndirilmişdir.
Tədbirdə, Tacikistanda akkreditə olunmuş diplomatik missiyaların rəhbərləri və əməkdaşları, Tacikistan Respublikasının dövlət qurumlarının və ictimaiyyət nümayəndələri, aparıcı kütləvi informasiya vasitələrinin təmsilçiləri və Azərbaycan diasporasının üzvləri iştirak etmişlər.
Filmin nümayişindən öncə, Azərbaycan Respublikasının Tacikistandakı səfiri Əlimirzamin Əskərov çıxış edərək, Azərbaycanın 2020-ci ildə 44 günlük Vətən müharibəsi nəticəsində qazandığı qələbədən söhbət açmış, Şuşanın işğaldan azad edilməsinin müharibənin qəhrəmanlıq zirvəsi olduğunu, Zəfər Gününün hər bir azərbaycanlı üçün ən əziz bayram olduğunu qeyd etmiş, həmçinin təqdim olunmuş filmin həsr olunduğu "Xarı Bülbül” və Şuşa şəhəri haqqında qısa məlumat vermişdir.
Azərbaycan xalqının Ümummilli Lideri Heydər Əliyevin Şuşanın tarixi hissəsini tarix-memarlıq qoruğu elan etməsi və bunun nəticəsində Şuşanın abidələrinin qorunması, görkəmli mədəniyyət və incəsənət xadimlərinin xatirəsinin əbədiləşdirilməsi istiqamətində ciddi addım olduğunu, onun füsunkar təbiətində rast gəlinən "Xarı Bülbül”ün məhdud yetişmə arealının olduğunu, Azərbaycan xalqında bu çiçəyin gözəlliyi və əzəməti haqqında çoxlu əfsanə və rəvayətlər yarandığını qeyd etmiş, Şuşa Konservatoriyasının parlaq nümayəndələrinin dünyanın bütün guşələrində Azərbaycan musiqisini layiqincə təmsil edərək ona şöhrət gətirdiyini ifadə etmişdir.
Daha sonra sənədli filmin nümayişi keçirilmiş və tamaşaçılar tərəfindən böyük maraqla qarşılanmışdır.
