Yeni Azərbaycan Partiyasının icra katibinin müavini, deputat Siyavuş Novruzov Hafta.az-a açıqlamasında partiyasının ümumi kütləvi görüş keçirməsi haqda danışıb.

O bildirib ki, mitinqlər rayon təşkilatları tərəfindən ayrı-ayrı keçiriləcək: “YAP-ın o qədər geniş sosial bazası, elektoratı var ki, biz ümumi mitinq keçirmək üçün yer tapa bilmirik. Bizim ən kiçik rayon təşkilatımız Milli Şuranın keçirdiyi mitinqdən böyük görüş keçirir. Məsələn, Ağsatfa, Qazax, İmişli və başqa rayonlarda 15-20 minlik mitinqlərimiz keçirilib. Bakıda isə fikirləşirik ki, bu görüşləri ayrı-ayrı rayonlar keçirsin. Çünki bütövlükdə mitinq keçirmək üçün meydan tapa bilmirik”.

S.Novruzovun sözlərinə görə, YAP-ın ən kiçik rayon təşkilatı mitinqə Milli Şuradan çox adam çıxarır: “Təkcə Yasamalda 24 min, Səbayeldə 23 min, Nərimanov 20 min, Xətai 20 min, Nəsimi 21 min adam partiyanın rayon təşkilatlarının üzvüdü. Ən kiçik rayon olan Xızıda mitinqə 5 min adam gəlib. Ümumi olaraq 600 mindən artıq üzvümüz var. Bunların ailə üzvlərini və yaxın ətrafını əlavə etsək, görərik ki, səsvermə hüququ olan hər kəs YAP-ın təəssübkeşləridi. Belə olan təqdirdə təbii ki, YAP-ın mitinqinə gəlmək istəyənlərin sayı 3 milyondan artıq olur. Buna görə də mitinq keçirmək üçün yer tapa bilmirik”.