Xəbər verdiyimiz kimi, son günlərdə Gəncə şəhəri və Samux rayonunda yas mərasimləri zamanı qida zəhərlənməsi halları qeydə alınıb.
Belə ki, iyulun 12-də Gəncə şəhərində 7 nəfər, iyulun 14-də daha 3 nəfər, iyulun 15-də isə Samux rayonunda 12 nəfər qida zəhərlənməsi şübhəsi ilə tibbi yardıma müraciət edib.
Yas mərasimləri bəzi şəhərlərdə xüsusi mərasim evlərində təşkil olunsa da, rayonlarda hələ də açıq havada, çadır və müvəqqəti qurulan məkanlarda keçirilməsi geniş yayılıb. Bu zaman çox sayda insan üçün əvvəlcədən hazırlanan yeməklər bəzən uzun müddət açıq şəraitdə saxlanılır.
Belə şəraitdə keçirilən yas mərasimlərində qidaların nə dərəcədə təhlükəsiz olması isə suallar yaradır.
Mövzu ilə bağlı AZXEBER.COM-a danışan qida eksperti Fərid Səfərov bildirib ki, qida məhsullarının uzun müddət yüksək temperatur altında saxlanılması onların təhlükəsizliyini ciddi şəkildə azalda bilər:
"Xüsusilə ət, süd məhsulları, hazır yeməklər, kolbasa, kremli şirniyyatlar və dəniz məhsullarında bakteriyalar sürətlə çoxalaraq qida zəhərlənməsi riskini artırır. Bu cür məhsulların istifadəsi ürəkbulanma, qusma, ishal, qarın ağrısı və hərarət kimi əlamətlərlə müşayiət oluna bilər. Bundan əlavə, günəş işığı qidaların tərkibindəki bəzi vitaminlərin parçalanmasına, yağların oksidləşməsinə və məhsulun dad, qoxu və keyfiyyətinin pisləşməsinə səbəb ola bilər. Hətta qablaşdırılmış məhsullar belə istehsalçının göstərdiyi saxlanma temperaturuna əməl edilmədikdə təhlükəsizliyini itirə bilər”.
Ekspert tövsiyə edir ki, qida zəhərlənmələrinin qarşısını almaq üçün məhsulların saxlanma şəraitinə xüsusi diqqət yetirilməlidir:
"İstehlakçılar alış zamanı məhsulun harada və hansı şəraitdə saxlanıldığına diqqət etməli, birbaşa günəş altında satılan, soyuducu rejimi tələb etdiyi halda açıq havada saxlanılan qidalardan uzaq durmalıdırlar. Xüsusilə yay aylarında qidaların düzgün temperaturda saxlanılması qida zəhərlənmələrinin qarşısının alınması üçün əsas şərtlərdən biridir”.
Fəridə Əsədzadə
