Nəqliyyat məsələləri üzrə ekspert Eldəniz Cəfərov AZXEBER.COM-a açıqlamasında deyib ki, Nazirlər Kabinetinin yeni qərarı, əsasən, ölkəmizdə avtomobil parkının yenilənməsinə və ekoloji vəziyyətin, ekosistemin yaxşılaşdırılmasına yönəlib.

Ekspert qeyd edib ki, yaşı 10 ildən çox olan avtomobillərin sayı ölkəmizdə həddən artıq çoxdur: "Həmçinin qeyd etmək lazımdır ki, son illər ərzində Gürcüstandan da bizim ölkəmizə yararsız, ömrünü başa vurmuş "metallom” daşınırdı və bunun da qarşısını qismən alacaq. Ola bilər ki, bu qərarın verilməsi qarşıdan gələn yeni bir qərarı şərtləndirir. Gözlənilir ki, Azərbaycanın Avro-5 ekoloji standartlara keçidi olsun. Hazırda bizim ölkəmizdə Avro-4 standartları tətbiq edilir. Bu qərardan sonrakı növbəti qərar Avro-5-ə keçidi ilə bağlı ola bilər”.

"Bununla yanaşı qeyd etmək istərdim ki, qərarın qüvvəyə minmə tarixi 30 gündən sonradır. Hazırda vətəndaşlarımızın xarici ölkədən aldığı minlərlə avtomobil var ki, onlar yoldadır. Cənubi Koreya, Yaponiya, ABŞ kimi uzaq ölkələrdir ki, oradan da gəmi vasitəsilə bu avtomobillərin gətirilməsi minimum iki ay vaxt alır, iki aydan çox da olur. Ona görə də düşünürəm ki, dövlət bunları nəzərə alaraq, həmçinin özünün sosial yönümlü siyasətini nəzərə alaraq, 30 gün müddətini 60 günə qədər uzatsa, daha yaxşı olar. Hazırda vətəndaşların sifariş etdiyi, hətta ödənişini etdiyi o avtomobillər ölkəyə daxil ola bilsin ki, vətəndaşlar ziyana düşməsinlər. Əks təqdirdə həmin maşınlar Gürcüstan limanlarında qala bilər, bu da bizim vətəndaşlarımıza, sahibkarlarımıza külli miqdarda ziyan vura bilər. Təklifimiz ondan ibarətdir ki, artıq sifariş edilmiş və pulu ödənilmiş avtomobillərin ölkəyə buraxılması təmin edilsin və ya bu müddət ən azı 60 günə qədər uzadılsın ki, şəxslər külli miqdarda ziyana düşməsinlər”.

"Düşünürəm ki, bu qərardan sonra yay mövsümündə ikinci əl avtomobil bazarında köhnə maşınların qiyməti təxminən iki faiz civarında yüksələ bilər”, - deyə ekspert əlavə edib.