ABB-nin 27 sentyabr Azərbaycan Respublikasında Anım gününə həsr olunmuş sosial məsuliyyət yadedirik.az layihəsi faəliyyətini dayandırıb. Belə ki, sayta daxil olmaq mümkün deyil.
AZXEBER.COM xəbər verir ki, bu haqda tanınmış ekspert Cahid İsmayıloğlu məlumat verib.
O şəhidlər ilə bağlı sayta daxil olmağın mümkün olmadığını deyib:
"2021-ci ildə yaradılmış bu veb-sayt artıq fəaliyyətini dayandırıb. Bəlkə də yaddan çıxıb: www.yadedirik.az
Şəhidlərimiz hər zaman bizim qəlbimizdədir, onlar ürəklərdə yaşayıb, yaşayır və yaşayacaq! Unutmayaq ki, onlar ən ali qürur mənbəyimizdir”.
Qeyd edək ki, ABB yadedirik.az portalını 27 sentyabr 2021-ci ildə istifadəyə vermişdi. Həmin vaxt bank yaydığı press-relizdə saytın genişlənəcəyi bildirmişdi:
"Növbəti mərhələlərdə portalda Birinci Qarabağ müharibəsi və 20 Yanvar şəhidləri haqqında məlumatların toplanması da nəzərdə tutulur. Layihənin davamında sənədli materiallar əsasında burada şəhidlərimiz haqqında daha geniş məlumatlar, tarixi oçerklər də yerləşdiriləcək. Beləliklə, https://yadedirik.az/ portalı şəhidlərimiz barədə ətraflı materiallarla zəngin, hər kəs üçün əlçatan məlumat bazasına çevriləcək”.
Ancaq görünən odur ki, bu iş davam etdirilməyib və hazırda yadedirik.az saytına daxil olmaq mümkün deyil.
Mövzunu diqqətdə saxlayacağıq.
12.06
AZXEBER.COM problemin nədən ibarət olduğunu öyrənmək üçün ABB-nin Marketinq departamentinin Korporativ kommunikasiya şöbəsinin müdiri Yedgar Cəfərov ilə əlaqə saxlayıb.
O bildirib ki, problemdən xəbərdardırlar: "Müvəqqəti texniki problemdir, qısa zamanda aradan qaldırılacaq".
