Məktəblərdə dərs ilinin başa çatması ilə minlərlə şagird yay tətilinə çıxıb.
Üç ay davam edən bu istirahət dövrü uşaqlar üçün sevinc, valideynlər üçün isə yeni məsuliyyət deməkdir. Xüsusilə hər iki valideynin işlədiyi ailələrdə məktəb yaşlı uşaqlar günün böyük hissəsini evdə keçirməli olur. Nəticədə onların əsas məşğuliyyəti telefon, planşet və televizor olur. Üç ayın tamamilə plansız keçirilməsi isə uşağın həm fiziki, həm psixoloji, həm də sosial inkişafına mənfi təsir göstərə bilər.
Bəs işləyən valideynlər övladlarının yay tətilini necə təşkil edə bilər?
Mövzu ilə bağlı AZXEBER.COM-a danışan təhsil eksperti Rafiq Məmmədov bildirib ki, valideyn nə qədər işləsə də, övladına vaxt ayırmalıdır:
"Valideynlərin ikisi də işləyirsə və yaxud tək valideyndirsə, övladı ilə məşğul olmağa vaxtı yoxdursa, əlbəttə ki, tövsiyə olunan budur ki, valideyn nə qədər işləsə də, öz övladına vaxt ayırsın. Valideynlə övlad arasında bir bağ olmalıdır. Çünki valideyn düşünür ki, məsələn, mən indi işləyirəm, pul ödəyirəm, evin kirayəsini ödəyirəm, maşının kreditini ödəyirəm və evə gəlirəm, yoruluram, övladımla məşğul ola bilmirəm. Amma valideyn dərk etməlidir ki, uşağın hər yaş dövrü bir dəfə yaşanır. Sənin övladın bir daha 5 yaşında olmayacaq, bir daha 10 yaşında, 4 yaşında və ya 15 yaşında olmayacaq. Bir gün valideyn ayılacaq ki, artıq övladı ilə vaxt keçirmək istəyir, amma uşaq onunla vaxt keçirmək istəmir”.
R.Məmmədov işləyən valideynlərin övladı ilə vaxt keçirməsi üçün bir sıra tövsiyələr verib:
"Məsələn, bazar günü səhər yeməyini birlikdə təşkil edə bilər. Həftə içində səhər evdən çıxanda və ya axşam evə gələndə övladı ilə kiçik də olsa ailə fəaliyyəti həyata keçirə bilər. Şənbə günü axşam övladı ilə popkorn alıb evdə film izləyə bilər. Həftə ərzində isə valideynlər hazırda fəaliyyət göstərən hazırlıq mərkəzləri və digər müəssisələrlə tanış ola bilərlər. Övladlarını səhər saat 10-da həmin mərkəzlərə təhvil verib, axşam saat 5-də götürə bilərlər. Həmin mərkəzlərdə uşaqlar üçün ingilis dili, rəqs, şahmat, rəsm dərsləri keçirilə bilər. Eyni zamanda uşaqlar üçün tennis, voleybol kimi idman fəaliyyətləri təşkil edilə bilər. Daha sonra hər axşam evə gəldikdə, nə qədər yorğun olsa da, övladından həmin gününün necə keçdiyini soruşa bilər. Bu, hesabat almaq formasında yox, sadəcə söhbət şəklində olmalıdır. Söhbət zamanı valideyn övladının hansı fəaliyyətlə məşğul olduğunu, həmin fəaliyyətlərin uşağa hansı müsbət təsirlər göstərdiyini anlaya bilər”.
Fəridə Əsədzadə
