Bu gün Gəncə şəhər, Gülüstan qəsəbəsindəki “İstiqlal” parkında 1 noyabr Milli Məclisə seçkilərlə bağlı təbliğat-təşviqat kampaniyası çərçivəsində 38 saylı Nizami ikinci (Gəncə) seçki dairəsi üzrə YAP tərəfindən namizədliyi irəli sürülən Həmzəyev Naqif Ələşrəf oğlunun seçicilərlə görüşü keçirilib.
AZXEBER.COM xəbər verir ki, təbliğat qrupunun üzvləri və seçicilər çıxış edərək, Azərbaycanın sürətli inkişafı fonunda Gəncədə də möhtəşəm quruculuq- abadlıq işlərinin aparıldığını, iri miqyaslı infrastruktur layihələrin reallaşdığını, Gəncənin beynəlxalq səviyyədə sənaye və mədəniyyət mərkəzi olaraq tanındığını, insanların firavanlığının təmin olunduğunu, şəhərin “2016-ci il üçün Avropanın Gənclər paytaxtı” olaraq, daha bir zirvəni fəth etdiyini, qazanılan nailiyyətlərdə Naqif Həmzəyev kimi təşəbbüskar, yenilikçi və işgüzar gənclərin xüsusi əməyi olduğunu vurğulayıblar.
Deputatlığa namizəd Həmzəyev Naqif Ələşrəf oğlu seçicilərə və bütün gəncəlilərə ölkə Prezidenti, Yeni Azərbaycan Partiyasının Sədri İlham Əliyevin ətrafında sıx birlik nümayiş etdirdiklərinə, partiyanın namizədlərinə dəstək olduqlarına və etimad göstərdiklərinə görə dərin minnətdarlığını bildirib. Cəmiyyətdə millət vəkili səlahiyyətinin nə qədər şərəfli və məsuliyyətli olduğunu, siyasətdə aparıcı rol oynadığını diqqətə çatdırıb.
Vurğulayıb ki, Yeni Azərbaycan Partiyası “Yeni hədəflərə doğru!” sizin və bizim köməyimizlə uğurla addımlayacaq, müstəqil Azərbaycan yeni zirvələri fəth edərək, dünyanı heyran qoyacaq. Hər birimiz də vicdanımızla, əməlimizlə və töhfələrimizlə Vətənimizə, xalqımıza və Partiyamıza sədaqətlə xidmət edəcəyik.
Tədbir “Yaşasın müstəqil Azərbaycan!”, “Eşq olsun, Yeni Azərbaycan Partiyasına və onun Sədri cənab İlham Əliyevə!”, “Var olsun birliyimiz və həmrəyliyimiz!” nidaları ilə yekunlaşıb.
