“Yeni Müsavat” qəzeti Milli Şuranın prezidentliyə namizədi Cəmil Həsənlini ələ salır.

Bu günkü sayında “Prosesi “saxlamoon”!” adlı yazı başlığı ilə qəzet C.Həsənlinin debatlarda ləhcə ilə danışmasına sataşıb və onun danışıq tərzini yamsılayaraq rişxənd edib.

Əslində bu, “Yeni Müsavat”ın Cəmil Həsənliyə qarşı ilk belə siyasi manipulyasiya cəhdi deyil.

Jurnalistikanın psixoloji incəliklərinə bələd olanlar yaxşı bilir ki, yazı başlıqlarını elə seçmək olar ki, o, beyində tamamilə başqa assosiasiya yaratsın.

Məsələn, “Yeni Müsavat” qəzeti 25 avqust 2013-cü il tarixli 224-cü sayında belə bir başlıq seçib:

“Bizim Cəmil müəllim”. Yəqin, hamı bu başlığı oxuyanda dərhal “Bizim Cəbiş müəllimi” xatırladı. Və ya qəzet elə həmin nömrəsində C.Həsənli haqqında yazıya belə bir başlıq seçir: “Bizim namizəd də ingilis dilini bilir...”.

Burada da ironik üslubda C.Həsənli ələ salınır.

Başqa bir misal - “Yeni Müsavat” qəzetinin 4 sentyabr 2013-cü il tarixli 234-cü sayında, özü də 2-ci səhifədə belə bir başlıq var: “Bir müəllim prezidentimiz çatmırdı”. Ağıla yenə universitet müəllimi Cəmil Həsənli gəlir. Yalnız yazını oxuyandan sonra anlamaq olur ki, söhbət başqa mətləbdən gedirmiş.

“Yeni Müsavat” qəzetinin C.Həsənliyə qarşı “üstüörtülü” qara PR aparmasını qəzetin seçkiqabağı bütün saylarında aşkar etmək mümkündür. Hətta C.Həsənliyə verilən sualların qoyuluş forması da bir çox hallarda ironikdir.

Buradan aşağıdakı qənaətlər hasil olur:

1. “Yeni Müsavat”ın C.Həsənlini müdafiə yazıları, onun fikirlərini silsilə şəklində dərc etməsi əslində “gözdən pərdə asmaq” mahiyyəti daşıyıb;

2. “Müsavat” başqanı İsa Qəmbər C.Həsənlinin müxalifətin önünə keçmək cəhdlərini həzm etməyib və onu “Yeni Müsavat” vasitəsilə müntəzəm olaraq “vurub”. Bu xətt onun C.Həsənlinin seçicilərlə görüşlərindəki çıxışlarında MŞ-nın namizədinin bəzi fikirlərini təkzib etməsi ilə aydın müşahidə olunub;

3. “Azadlıq” qəzetinin qəfil “Yeni Müsavat”a qarşı çevrilməsi C.Həsənliyə qarşı aparılan gizli kampaniya ilə əlaqədar qrupdaxili şübhələrə əsaslanıb;

4. “Yeni Müsavat” qəzetinin hələ seçki dövründəki davranışına əsaslanaraq seçki məğlubiyyətindən az sonra C.Həsənliyə qarşı daha böyük qara PR kampaniyası aparacağına, bütün “günah”ları ona “yükləyəcəyi”nə və İsa Qəmbəri “təmizə çıxarmaq” üçün yeni fazaya keçəcəyinə mühüm işarə var.

5. “Yeni Müsavat” oxucularını siyasi manipulyasiyadan istifadə etməklə aldadıb.Gün.Az-ın analitik qrupu