Son günlər ölkədə həm uşaqlar, həm də böyüklər arasında respirator xəstəliklərin yayılması müşahidə olunur. Xüsusilə mövsümi dəyişikliklərlə əlaqədar artan virus infeksiyaları əhali arasında narahatlıq yaradıb. Həkimlər bildirirlər ki, bəzi hallarda bu xəstəliklər ağırlaşaraq pnevmoniyaya çevrilə bilər.
Tibb elmləri doktoru, professor Adil Qeybulla AZXEBER.COM-a bildirib ki, bu infeksiyanın respirator sinsitial virus olması ehtimal edilir:
"Bu virus bəzi hallarda uşaqların vəziyyətini xeyli ağırlaşdıraraq, hətta pnevmoniyaya gətirib çıxara bilər. Ehtimal olunur ki, bu infeksiya respirator sinsitial virusdur. Yəni A tipli influenza virusu deyil. Lakin bunun dəqiq müəyyənləşdirilməsi üçün rəsmi qurumların açıqlaması vacibdir, çünki virusun identifikasiyasını məhz onlar aparırlar”.
O qeyd edib ki, xəstəliyin ağırlaşmasının qarşısını almaq üçün uşağın yataq rejimində qalması vacibdir:
"Həm respirator sinsitial virus, həm də influenza xüsusilə iki yaşa qədər uşaqlarda bronxit və pnevmoniya əlamətləri yarada bilər. Xəstəlik əsasən hərarət, öskürək, təngnəfəslik, burun axması, halsızlıq və zəiflik kimi simptomlarla müşayiət olunur.
Ümumilikdə, xəstəliyin ağırlaşmasının qarşısını almaq üçün uşağın yataq rejimində qalması və bol maye qəbul etməsi tövsiyə olunur. Hərarət 38,5 dərəcəyə qədərdirsə, onu dərhal salmaq məsləhət görülmür. Lakin bu göstəricidən yuxarı qalxdıqda hərarətin aşağı salınması vacibdir. Uşağa əsasən vitaminlə zəngin qidalar və maye verilməlidir. Əgər 2–3 gün ərzində vəziyyətdə yaxşılaşma müşahidə olunmazsa, mütləq həkimə müraciət edilməli və onun tövsiyəsinə uyğun müalicə aparılmalıdır”.
İnfeksionist bildirib ki, bu xəstəliklər üçün spesifik müalicə üsulu yoxdur:
"Bu xəstəliklər üçün spesifik müalicə üsulu yoxdur, müalicə əsasən simptomatik və orqanizmi dəstəkləyici xarakter daşıyır. Həkim məsləhəti olmadan öskürəyə qarşı və ya bəlğəmgətirici dərmanların verilməsi məqsədəuyğun deyil. Bu, xəstəliyin gedişini uzada və vəziyyəti daha da ağırlaşdıra bilər”.
Səhiyyə Nazirliyinin mütəxəssis-eksperti, infeksionist Təyyar Eyvazov AZXEBER.COM-a bildirib ki, bu hal "yeni” virusla əlaqəli deyil:
"Son vaxtlar müşahidə olunan bu simptomlar kompleksi bir neçə mövsümi respirator virus infeksiyasının dövriyyədə olması ilə əlaqədardır. Bu hal "yeni” virusla bağlı deyil, bir neçə infeksiyanın eyni vaxtda sirkulyasiyasından qaynaqlanır. Klassik qripdən fərqlənən, lakin oxşar simptomlar yaradan əsas törədicilər adenoviruslar, rinoviruslar və digərləridir. Bunlar boğazda kəskin ağrı, uzunmüddətli halsızlıq və bəzən sümük ağrıları ilə müşayiət olunur.
Mövsüm dəyişiklikləri orqanizm üçün bioloji stress yaradır. Gün ərzində temperaturun kəskin dəyişməsi (səhər soyuq, günorta isti) orqanizmin müdafiə baryerlərini zəiflədir. Quru və ya həddindən artıq rütubətli hava tənəffüs yollarının selikli qişasını həssaslaşdırır ki, bu da virusların hüceyrələrə daxil olmasını asanlaşdırır”.
O qeyd edib ki, virus bədəndə çoxaldıqca immun sistemi sitokinlər ifraz edir:
"İnsanların "sümük ağrısı” kimi təsvir etdiyi hal əslində orqanizmin intoksikasiya (zəhərlənmə) əlamətidir. Virus bədəndə çoxaldıqca immun sistemi sitokinlər ifraz edir. Bu maddələr iltihab prosesini başladır və nəticədə əzələ və oynaq ətrafındakı sinir uclarını qıcıqlandıraraq şiddətli ağrı hissi yaradır”.
T. Eyvazov bildirib ki, bir neçə məqama diqqət etmək lazımdır:
"Bol maye qəbulu toksinlərin bədəndən xaric olunmasını sürətləndirir. Əgər qızdırma 3 gündən artıq davam edərsə və ya tənəffüs çətinləşərsə, infeksiyanın bakterial formaya keçməməsi üçün mütləq həkim müayinəsindən keçmək lazımdır. Vitamin balansı (xüsusilə D və C vitaminləri) və yuxu rejimi immun sisteminin bərpası üçün həlledicidir.
Bu vəziyyət adətən 7–10 gün ərzində tam sağalma ilə nəticələnir”.
Şahanə Ziyad
