26 avqust 2014-cü il tarixində Azərbaycanın Avstraliya İttifaqı, Fici Respublikasındakı və Yeni Zelandiyaya təyin olunmuş Səfiri Rövşən Cəmşidov etimadnaməsini Yeni Zelandiyanın General-Qubernatoru general - leytenant Cerri Mateparaeyə (Jerry Mateparae) təqdim etmişdir.
Etimadnamənin təqdim edilməsindən sonra General-Qubernator ilə səfir arasında görüş keçirilmişdir. General-Qubernator R.Cəmşidovu Azərbaycanın ölkəsinə təyin edilmiş ilk səfiri kimi təbrik etmiş, ona fəaliyyətində uğurlar arzulamışdır. General-Qubernator bu təyinatın ölkələrimiz arasında əlaqələri daha da inkişaf etdirəcəyinə ümidvar olduğunu demişdir. O, eyni zamanda, Azərbaycanın BMT Təhlükəsizlik Şurasının qeyri-daimi üzvü olduğu dövrdəki təcrübəsinin öyrənilməsinin Yeni Zelandiya üçün faydalı ola biləcəyini qeyd etmiş və BMT çərçivəsində ölkəmizlə faydalı əmekdaşlığa ümidvar olduğunu bildirmişdir. General-Qubernator ümumiyyətlə mövcud olan siyasi, iqtisadi, mədəni əlaqələrin daha da inkişaf etdirilməsi üçün hərtərəfli zəminin mövcudluğunu vurğulamış, salamlarının Azərbaycan Prezidentinə və xalqına çatdırılmasını xahiş etmişdir.
Səfir R.Cəmşidov fəaliyyəti dövründə ölkələrimiz arasında əlaqələrin daha da inkişaf etdirilməsi üçün əlindən gələni əsirgəməyəcəyini demişdir.
Səfər çərçivəsində səfir R.Cəmşidovun Yeni Zelandiyanın Xarici İşlər və Ticarət Nazirliyinin (XİTN) Avropa İdarəsinin rəisi cənab İan Hill, XİTN-nin protokol idarəsinin rəisi xanım Karolin Bilkey, nazir müavini cənab Bede Korri ilə də görüşləri olmuşdur.
Görüşlər zamanı ölkələrimiz və nazirliklər arasında daha yaxın əlaqələrin qurulması imkanları, enerji, kənd təsərrüfatı və təhsil sahəsində əməkdaşlıq əlaqələrinin yaradılması uçün geniş imkanların mövcud olduğu qeyd edilmişdir.
