Yunanıstanda bu gün yüksək temperaturun hökm sürdüyü bölgələrdə saat 12:00-dan 17:00-a qədər açıq yerlərdə işçilərin işə götürülməsi qadağan edilib.
AZXEBER.COM xarici mətbuata istinadən xəbər verir ki, Yunanıstanın Əmək və Sosial Müdafiə Nazirliyi verdiyi açıqlamada Meteorologiya İdarəsinin bu həftə ölkə daxilində hava istiliyində əhəmiyyətli artım olacağını açıqlayıb və yüksək temperatur səbəbiylə işçilər üçün alınması lazım olan tədbirləri sadalayıb.
Bu çərçivədə, Orta Makedoniya, İon adaları, Qərbi Yunanıstan, Thessaly, Messinia bölgələri, Samos və Rodos adalarında fiziki güc tələb edən işlərdə işçilərin bu gün saat 12:00-17:00 arasında açıq sahədə işləməsinə icazə verilməyəcək.
Yük daşımaları, kuryer işi, tikinti və tərsanə işləri kimi sahələrdə işlər dayandırılıb.
Mülki Müdafiə Baş Katibliyi də açıqlama verərək vətəndaşlardan yüksək temperaturdan qorunmağa çağırıb. Elanda vətəndaşlardan sərin və kölgəli yerlərdə qalmaları, fiziki güc tələb edən işlərdən uzaq durmaları, günəş vannası qəbul etməmələri, küçəyə çıxarkən papaq və gün eynəklərindən istifadə etmələri, açıq rəngli, pambıq paltar geyinmələri, ağır yeməklərdən uzaq durmaları, spirtli içkilərdən çəkinmələri, bol su içmələri xahiş olunur.
Yunanıstan Meteorologiya Xidmətinin proqnozlarına görə, bu həftə ölkə ərazisində havanın temperaturu yüksək olacaq. Bəzi rayonlarda havanın temperaturu 40 dərəcəni keçəcək.
Gülay
