Dövlət rəsmilərinin üzv olduğu Təşkilat Komitəsi “Eurovision -2012” mahnı müsabiqəsinin təşkili və keçirilməsi ilə bağlı tədbirlər planı hazırlayıb, həyata keçirəcək.
“Eurovision 2012” mahnı müsabiqəsinin təqdimatında əsasən rejissor və prodüsser əməyindən istifadə olunacaq. Maraqlıdır, beynəlxalq miqyasılı tədbirdə hökumət yerlimütəxəssislərə müraciət edəcəkmi? Yeri gəlmişkən qeyd elək ki, prezidentin bu işə böyük diqqət ayırması, hazırlıq işlərinin ölkənin birinci xanımına həvalə olunması habelə dövlət rəsmilərinin, nazirləri bilavasitə bu istiqamətə yönlədirilməsi Azərbaycanın dünyaya böyük sürpriz hazırladığından xəbər verir.
Müsabiqənin təşkilində iştirak üçün yerli rejissor və prodüsserlərinə müraciət olunub-olunmamağını aydınlaşdırmaq istədik. Kino-ssenarist və rejissor, əməkdar incəsənət xadimi, Respublika Dövlət Mükafatı laureatı Ramiz Fətəliyev müsabiqədə rejissor işi üçün ona təklif gəlmədiyini dedi. O, təklif gəlsə belə imtina edəcəyini bildirdi. “Biz belə tədbirlər keçirməmişik, ona görə də bizdən mütəxəssis ola bilməz. “Eurovision” tamam ayrı texnologiyadır, biz onnla tanış deyilik. Bu layihənin özünün mütəxəssisləri var”. Ramiz Fətəliyev güman edir ki, müsabiqənin hazırlanması üçün rejissorlar xarici ölkələrdən dəvət olunacaq. “Xarici ölkələrdə mütəxəssislər çoxdur. Bizim bir saata gördüyümüz işi, onlar bir dəqiqəyə görürlər”.
Rejissor Məhərrəm Bədirzadə də “Eurovision-2012” müsabiqəsində rejissor fəaliyyəti üçün dəvət almadığını deyir. “Belə bir təklif gəlməyib, gələcəyini də gözləmirəm”.
“Ritm production” kino şirkətinin direktoru, kinoprodüser Xaqani Həşimov da müsabiqəyə prodüsserlik etmək üçün ona təklif gəlmədiyini bildirdi. O da təşkilatçılardan dəvət gözləmir. «Ola bilər ki, hansısa təkliflər olsun. Məsələn, çəkiliş, sənədli film, video- roliklərlə bağlı müraciət oluna bilər”.
Xaqani Həşimov xarici prodüserlərə müraciət olunacağını istisna etmir. Onun fikrincə, xarici prodüserlərin bu layihədə iştirakı ölkədə təcrübəli prodüserlərin olmadığını göstərməyəcək. “Bu dünya əhəmiyyətli tədbirdir. Ola bilsin ki, xarici ölkələrin mütəxəssisləri ilə məsləhətləşmələr olacaq. Onlar ölkəyə dəvət oluna bilərlər”.
Prezidentin sərəncamı ilə yaradılan Təşkilat Komitəsinə Mədəniyyət və Turizm Nazirliyi də daxildir. Nazirliyin mətbuat katibi İntiqam Hümbətov “Eurovision- 2012” mahnı müsabiqəsində iştirak edəcək rejissor və prodüserlərin adlarının Təşkilat Komitəsinin iclasından sonra ictimaiyyətə açıqlanacağını bildirdi. “Təşkilat Komitəsi toplantı keçirdikdən sonra verilən qərarı ictimaiyyətə açıqlayacaq. Bu dəqiqə heç nə deyə bilmərəm. Hazırlıqlar gedir”. Mətbuat katibi Komitənin nə zaman toplantı keçirəcəyindən xəbərsiz olduğunu vurğuladı. O, “Eurovision-2012” mahnı müsabiqəsinə dövlət səviyyəsində hazırlıqların aparıldığını bildirdi. “Bu dövlətin diqqətində olan məsələdir. Cənab Prezident bu müsabiqəyə çox önəm verir. Ölkənin birinci xanımı Mehriban xanım hazırlıq üzrə Təşkilat Komitəsinin sədridir. Onlar ictimaiyyətə cavab verəcəklər”.
Sevinc Vaqifqızı, bizimyol qəzeti
