Şikayətçi bildirir ki, Salyan rayon icra hakimiyyətinin başçısının Salyan şəhəri üzrə nümayəndəsi Kamil Əzizov və Salyan rayon icra hakimiyyəti başçısının köməkçisi Kamran Həsənov məndən bir neçə dəfə abadlaşdırma adı ilə 1400 manat rüşvət tələb ediblər. Mən imkanım olmadığını deyib həmin pulu verməkdən imtina etdim. 29.06.2011-ci il tarixdə isə Salyan rayon icra hakimiyyətinin başçısı Tahir Kərimov 25 nəfər və polislə mənim mağazama gəldi və məndən abadlıq işləri üçün pulu niyə vermədiyimi soruşdu. Mən ikinci qrup əlilliyimlə bağlı davamlı müalicəyə görə pula ehtiyacım olduğu üçün tələb olunan məbləği vermək imkanım olmadığını dedim. İcra başçısı mənim bu sözümdən sonra bərk əsəbiləşdi, əvvəlcə tapşırdı ki, vergini də bu işə cəlb edib, sahibkarın işini və sənədlərini yoxlasınlar. Polisə isə göstəriş verdi ki, “bunun mallarını yığışdırın və mağazanı da bağlayın!”. Mən onlara bütün sənədlərimin qaydasında olduğunu və vergi ilə heç bir problemimin olmadığını söylədim və dedim ki, “əgər mağazanı bağlasanız, özümü elə buradaca öldürəcəyəm” və bundan sonra onlar çıxıb getdilər. 30 iyun 2011-ci il tarixdə isə Kamil Əzizov öz işçisilə mənə xəbər göndərdi ki, “Eybi yoxdur, biz həmin məbləğin yarısına razıyıq.”. Mən isə imkanım olmadığına görə yenə də imtina etdim.
Bundan başqa, Korrupsiyaya qarşı Mübarizə Fondunun ünvanına daxil olmuş məlumata görə Salyan şəhəri, Xəlilrza Ulutürk 53 ünvanında yerləşən pərdə dükanından da Salyan rayon icra hakimiyyətinin başçısının Salyan şəhəri üzrə nümayəndəsi Kamil Əzizov Salyan rayon icra hakimiyyətinin başçısının adından bir neçə dəfə abadlaşdırma üçün 2000 manat pul istəyib. Həm də ona deyib ki, “əgər pulu verməsən mağazanın qabağını hasarla hördürəcəyəm”. Bu günə olan məlumata görə, artıq bir neçə mağaza pul vermədiklərinə görə zorla bağlanılıb.
Şikayətçilər öz müraciətlərində məmurların AR Cinayət Məcəlləsinin 190-cı maddəsinə əsasən “Qanuni sahibkarlıq fəaliyyətinə mane olma” kimi cinayət məsuliyyəti daşımalarının təmin olunmasını və korrupsiya əməlləri ilə sahibkarlığın inkişafına mane olan məmur özbaşınalığından xilas olmaq üçün dövlət başçısından kömək istədiklərini bildirirlər.
Aşağıdakı şəkillərdə Salyanda Icra Hakimiyyətinə pul vermədiklərinə görə qarşısı daşla hörülən mağazaları və bu işə rəhbərlik edən iş icraçısı Həsəni görürsünüz.
