Bakının Yasamal rayonu ərazisində Birləşmiş Ştatlar vətəndaşı Amanda Erikson və Böyük Britaniya vətəndaşı Silya Devis naməlum şəxslər tərəfindən döyülüb. Onlardan biri - Silya Devisin sağ qolu sınıb. Yaralılar xəstəxanaya və polisə müraciət edib.
Faktla bağlı Yasamal rayon Polis İdarəsinin 26-ci polis bölməsində təhqiqata başlanılıb. Bölmədən verilən məlumata görə, hələlik Amanda Erikson və Silya Devisi döyən şəxslərin kimliyi müəyyən edilməyib.
Qeyd edək ki, zərərçəkənlərdən biri Amanda Erikson bir müddət “New-York Times” qəzetində çalışıb. Hazırda isə Bakı Slavyan Universitetində jurnalistikadan dərs deyir.
Azərbaycanın Baş Prokurorluğundan ANS-ə verilən məlumatda isə bildirilir ki, hazırda hadisə ilə bağlı müvafiq orqanlar araşdırmalar aparır, qanun çərçivəsində bütün tədbirlər görülür. Cinayəti törətmiş şəxslərin müəyyənləşdirərək məsuliyyətə cəlb olunması istiqamətində müvafiq tədbirlər həyata keçirilir.
Yasamal rayon Polis İdarəsinin rəisi İsmayıl Əsədov isə ANS-ə eksklüziv olaraq bildirib ki, 16 iyun 2011-ci il tarixdə saat 00:20 radələrində Amerika Birləşmiş Ştatlarının vətəndaşı Amanda Erikson və Böyük Britaniya vətəndaşı Silya Devis Yasamal rayonu ərazisində yaşadıqları ünvana qayıdarkən küçənin tinində dayanmış 3-4 nəfər naməlum şəxslərlə münaqişə zəminində aralarında mübahisə baş verib. Onun sözlərinə görə, onlar bu şəxslərin yanından keçərkən gənclərdən biri onlara söz atıb: "Azərbaycan Respublikası Cinayət Məcəlləsinin 221-ci maddəsi ilə (xuliqanlıq) cinayət işi qaldırılıb. Həmin şəxslərin tapılması istiqamətində əməliyyat-istintaq tədbirləri həyata keçirilir".
//ANS TV
