Proqnozlara görə, 2023-cü ildə inflyasiya səviyyəsi nisbətən aşağı düşəcək. Ekspertlər hesab edir ki, 2023-cü ildə inflyasiya səviyyəsinin 2022-ci illə müqayisədə azalması gözlənilir. Əgər belə olarsa, müəyyən sahələrdə qiymətlərin ucuzlaşması da müşahidə oluna bilər.
Məsələ ilə bağlı iqtisadçı ekspert Emin Qəribli AZXEBER.COM-a fikirlərini bildirib. Onun sözlərinə görə, növbəti il inflyasiyanın nisbətən azalması gözləniləndir:
"İnflyasiyanın azalması gələn il gözlənilir. Amma bu məsələlərlə bağlı inkişaf proqnozları var, müəyyən ssenarilər üzrə qurulur. Gələn il dünya iqtisadiyyatında resessiya (iqtisadi artım templərinin zəifləməsi və istehsalın çox da kritik olmayan həddə aşağı düşməsi) davam edərsə, təbii ki, bu, iqtisadiyyatın bütün sahələrinə təsir edəcək, o cümlədən də, enerji daşıyıcılarına. Son dövrlər enerji daşıyıcılarında azalmanı da hiss edirik. Təbii ki, bu da sənaye məhsullarına təsir edə bilər və bu ssenari ilə dünya iqtisadiyyatında resessiya davam edərsə, dünya bazarlarında məhsullarda müvəqqəti ucuzlaşmalar ola bilər. Amma bu, müvəqqqəti xarakter daşıya bilər”.
Ekspert qeyd edib ki, dünya iqtisadiyyatında iqtisadi inkişaf baş verərsə, burada azalma olmaz. Nisbətən inflyasiyanın dərəcəsinin azalması ola bilər. Çünki artıq inkişaf etmiş ölkələrin əksəriyyəti qabaqlayıcı tədbirlər görürlər. Yəni burada söhbət daha çox inflyasiyanın keçən il, ondan öncəki illə müqayisədə azalmasından gedir.
Emin Qəribli bildirib ki, son illər dünyada gedən proseslər dayanarsa, həmin gərginliklər səbəbilə baş verən qiymət artımları azala bilər:
"Bir şeyi də qeyd etmək lazımdır ki, son illər ərzində, pandemiya dövründə qida məhsullarının qiymətləri kəskin artırdı. Buna səbəb də qeyri-sabit geoiqtisadi və geosiyasi durumdur. Rusiya-Ukrayna münaqişələr və digər səbəblər. Bu problemlər həll olunarsa, o zaman müəyyən gərginlik aradan qaldırıla bilər, bu sahədə müəyyən azalmalar müşahidə oluna bilər. Yəni məhz qeyd olunan gərginliklərlə bağlı baş verən artım azala bilər. Dünya iqtisadiyyatına baxanda görünür ki, inflyasiya dərəcəsi ən azından 2-3 faiz mütəmadi olur. Azalma olsa da, həmin faizlə bağlanır. Ona görə də qiymətlərin kəskin ucuzlaşmasını hiss etmək olmur”.
Aydın Nuri
