Azərbaycan Şahmat Federasiyasının dəstəyi ilə Park Bulvar Alış-Veriş Mərkəzinin təşkilatçılıgı ilə "28 May Respublika Günü"nə həsr olunmuş "Park Bulvar Open" rapid reytinq turniri keçirilib.
Azərbaycanın tanınmış şahmat ustalarından Rauf Məmmədov, Eltac Səfərli, Nicat Abbasov, Zaur Məmmədov, Vüqar Rəsulov, Xəyalə Abduılla, Kamal Ağasiyev, Misrəddin İsgəndərov, Nərmin Xələfova, Ülviyyə Fətəliyeva və başqalarının iştirakı ilə keçirilən turnirə gənc və perspektivli uşaq şahmatçılar da qatılıb.
Son günlər yüksək performans nümayiş etdirən qrossmeyster Şəhriyar Məmmədyarov turnirdə fəxri qonaq qismində iştirak edib. O, bu tip turnirlərin gənc şahmatçılar nəslinin yetişməsində vacib rol oynadığını vurğulayıb.
Park Bulvar AVM-in PR meneceri Günay Malikqızı xalqımız üçün böyük önəm kəsb edən bir tarixə həsr olunmuş bu idman yarışının gələcəkdə ənənəvi turnir kimi hər il keçirilməsini planlaşdırdıqlarını qeyd edib.
7 oyundan topladığı 6 xalla qrosmeyster Zaur Məmədov turnirin qalibi adını qazanıb. Digər qrosmeysterlər Eltac Səfərli yarışı ikinci, Vüqar Rəsuov isə üçüncü pillədə başa vurublar.
12 yaşadək şahmatçılar arasında Xəzər Babazadə, qadın şahmatçılar arasında isə Səbinə İbrahimova birinci olublar.
Turnirin mükafatçıları fəxri diplomlar və hədiyyələrlə təltif olunublar.
