Artıq deputatlığa namizədlərin qeydiyyatı prosesinə start verilib və bəzi partiyalar, müstəqil namizədlər seçkilərdə iştirak edəcəkləri dairələri açıqlayırlar.
Parlament seçkilərində ən gərgin mübarizənin gedəcəyi seçki dairələrindən bir də 125 saylı Zəngilan - Qubadlı seçki dairəsi olacaq.
AZXEBER.COM-un məlumatına görə, artıq bu dairədən 2 iddialı namizəd deputat olmaq üçün mübarizəyə qoşulub.
Bunlardan biri tanınmış professor, "Müsavat" partiyasının namizədi Nəsiman Yaqublu, digəri isə tanınmış jurnalist İntiqam Valehoğludur.
Artıq indidən demək olar ki, bu seçki dairəsində çox gərgin seçki prosesi baş tutacaq.
Onu da qeyd edək ki, hazırda həmin dairədən deputat İmamverdi İsmayılovdur. o 1995-ci ildən - yəni nə az, nə çox düz 29 ildir ki, millət vəkilidir.
İsmayılov YAP-ın namizədi olduğu üçün qarşıdan gələn seçkilərdə yenidən iştirak edib-etməyəcəyi ilə bağlı hələlik yekun qərar yoxdur. Hakim partiyanın yaxın günlərdə namizədlərini açıqlayacağı gözlənilir. Hakim partiya seçkilərə daha güclü və enerjili namizədlərlə gedəcək.
YAP-ın yenidən İmamverdi İsmayılovun namizədliyini irəli sürüb-sürməyəcəyi yaxın günlərdə məlum olacaq. Ancaq məlumdur ki, cəmiyyət yeni dövrdə yeni simalar görmək istəyir və bu səbəbdən İsmayılovla davam etmək Zəngilan - Qubadlı seçki dairəsində YAP üçün xoşagəlməz sürprizlə nəticələnə bilər.
Altay
