31 Mart - Azərbaycanlıların Soyqırımı günü ilə bağlı müxtəlif dillərə tərcümə olunmuş məlumatlar, foto və videolar sosial şəbəkələrdə (Facebook, Twitter və s.) paylaşılmışdır
İctimai Birlikdən AZXEBER.COM-a verilən məlumata görə, 31 mart 2012 - ci il tarixində “İRƏLİ” Gənclik Mərkəzinin Şuşa zalında “İRƏLİ” İnformasiya Texnologiyaları Mərkəzi "Məktəb Parlamenti" ilə birgə “31 Mart - Azərbaycanlıların Soyqırımı”nın 94-cü ildönümünə həsr olunmuş elektron aksiya həyata keçirmişdir. Aksiyaya 50 nəfərdən çox tələbə və məktəbli qoşulmuşdur. Əvvəlki illərdə keçirilən aksiyalardan əsas fərq bu aksiyada gənclərlə bərabər məktəblilər də aktiv şəkildə iştirak etmişdir.
Aksiya çərçivəsində iştirakçılar Azərbaycan xalqına qarşı həyata keçirilən soyqırım haqqında müxtəlif dillərə tərcümə olunmuş məlumatları, foto və videoları sosial şəbəkələrdə (Facebook, Twitter və s.) paylaşmışlar.
Qeyd edək ki, aksiyanın həyata keçirilməsində əsas məqsəd 31 Mart - Azərbaycanlıların Soyqırımı günü ilə bağlı həqiqətləri dünya ictimaiyyətinə, beynəlxalq təşkilatlara, kütləvi informasiya vasitələrinə çatdırmaqdır.
Xatırladaq ki, “İRƏLİ” İctimai Birliyi İnformasiya Texnologiyaları Mərkəzi tərəfindən hazırlanmış soyqırımla bağlı müxtəlif dillərə tərcümə olunmuş sənəd, kitab, video və foto materiallarla zəngin olan www.genocide.az saytı və www.31mart.wordpress.com bloqu fəaliyyət göstərir.
