Arnold Şvarsneqqer ABŞ-ın eks-prezidenti Con Kennedinin bacısı qızı Mariya Şrayverlə ayrılıb. "Los Angeles Times" yazır ki, Koliforniyanın keçmiş qubernatoru və həyat yoldaşı 25 illik nikahdan sonra artıq birlikdə yaşamırlar.
Şvarsneqqerin və Şrayverin ərizəsində deyilir: "Bizim həyatımızda böyük dəyişikliklər yaşandı. Uzun düşüncələrdən, diskussiyalardan və dualardan sonra biz ayrılmaq qərarını aldıq. Hal-hazırda biz ayrı yaşayırıq və gələcək münasibətlərimiz üzərində işləyirik."
Ərizədə "Biz uşaqlarımızı birlikdə tərbiyə edirik, onlar bizim həyatımızın ən vacib hissələridir", deyə qeyd olunub.
"Los Angeles Times" Şvarsneqqerin və Şrayverin artıq bir neçə həftədir ayrı yaşadığını yazır. Onlar qəzetlərin yaydığı məlumata cavab olaraq bəyanatla çıxış ediblər. Məqalədə eks-qubernatorun və NBC telekanalının keçmiş jurnalistinin rəsmi boşanacaqları barədə heç nə deyilmir.
