- Bəzi müxalifət partiyalarının aprelin 2-də qanunsuz mitinq keçirtmək cəhdlərinin qarşısı alındı. Siz müxalifətin qanunsuz mitinqə cəhdini necə dəyərləndirirsiniz?
- Şənbə günü "ümumxalq mitinqi" və yaxud onların iddia etdikləri kimi hakimiyyətdən narazıların "inqilabı" açıq-aşkar müxalifətin sosial bazasının yoxluğunu, cəmiyyətdə öz arxasınca adam apara bilməmələrini bir daha sübut etdi. Və ümumiyyətlə hakimiyyətə etiraz edənlərin, hakimiyyətdən narazı olan insanların müxalifətin ətrafında deyil, əksinə, bunların özünə qarşı olduqları göründü. Bu səbəbdən müxalifətin "mitinq alındı", "İlham Əliyev hakimiyyətinə qarşı böyük izdihamlar" kimi şüarlar səsləndirməsi boş şeydir, xülyadır və hamı hər şeyi gözü ilə gördü. Müxalifət yeganə olaraq nəyə nail ola bildi - öz simasını göstərdi. Artıq müxalifətin Azərbaycan cəmiyyətində, ictimai həyatında dağıdıcı, pozucu, dövlət həyatının ahəngini pozmaq siması göründü. Bunun da heç bir perspektivi yoxdur, belə cəhdlər də bir dəfə, iki dəfə, üç dəfə, bir neçə dəfə ola bilər. Buna görə də günün birində qanun qarşısında ciddi şəkildə cavab vermək lazım gələcək və cavab verəcəklər də. Müxalifətçilik belə olmur. Müxalifətçiliyin nə missiyası bu tipli fəaliyyət üzərində qurulur və ona söykənərək hakimiyyət uğrunda mübarizə aparılır, nə də bu yollarla, vasitələrlə müxalifətçilik etmək olmaz.
Düşünürəm ki, bu mitinq göstərdi ki, Azərbaycanda radikal müxalifətin heç bir ciddi sosial dayağı yoxdur, Azərbaycan hakimiyyətinin cəmiyyətdə dəstəyi yetərincədir. Bakı şəhər sakinləri radikal müxalifəti kifayət qədər dəstəkləmir və belə müxalifətçilik iflasa məhkumdur.
- Radikal müxalifətin fəaliyyətində kənar qüvvələrin rolu ola bilərmi?
- Əlbəttə müəyyən rolu ola bilər. Desək ki, müxalifəti Azərbaycanın xaricindən qızışdıranlar yoxdur, əlbəttə yanılarıq. Lakin bunların iddia etdikləri kimi bu, nə Avropa İttifaqı ölkələri, nə ABŞ-ın rəsmi administrasiyası, nə də digər dünya dövlətləri, hansısa beynəlxalq təşkilatlar deyil. Bunlar mövcud hakimiyyətin siyasətini dəstəkləməyən, həzm edə bilməyən müəyyən qüvvələr ola bilər. Azərbaycana təzyiq göstərmək istəyən müəyyən dairələr ola bilər, çünki Azərbaycan tam müstəqil siyasət yürüdür, dövlətin siyasəti onun milli maraqlarına, onun xalqının istək və arzularına söykənir. Hansısa xarici dövlətin diqtəsi ilə deyil, öz milli maraqlarından irəli gələn siyasət qurur. Xaricdə bunlara etiraz edən hansısa dairələr ola bilər, onlar da Azərbaycanda hakimiyyətin dəyişməsində maraqlı ola bilərlər. Amma bütovlükdə bu müxalifətin nə daxildə ciddi sosial dayağı var, nə də xaricdən müxalifəti ciddi qüvvələr dəstəkləyir.
- Radikal müxalifətin bu cür etiraz aksiyaları keçiriləndə dialoq çağırışları aktuallaşır. Necə hesab edirsiniz, bu gün iqtidar-müxalifət dialoquna ehtiyac yaranıbmı?
- Sağlam müxalifətlə Azərbaycanda dialoq zəruridir. Bütün cəmiyyətlərdə olduğu kimi, Azərbaycan cəmiyyətinin də belə dialoqlara, məsləhətləşmələrə, mütəmadi əməkdaşlığa ehtiyacı var və biz bunu aparırıq. Parlamentdə təmsil olunan siyasi partiyalar var, Azərbaycan dövlətinin dinc inkişafında, tərəqqi yolu ilə getməsində və Azərbaycan dövlətinin beynəlxalq aləmdə nüfuzunun yüksəlməsində maraqlı olan digər siyasi qüvvələr var. Bu tipli radikal qüvvələrlə dialoq çox çətindir. Hakimiyyətin bunları nəyə dəvət etməklərindən asılı olmayaraq, özlərinin bəlli oriyentasiyaları var, bəlli maraqları var, bununla da getməyə çalışırlar. Hazırda bu tipli radikal qüvvələrlə dialoq çətindir - amma normal, sağlam müxalifətlə, partiyalar arasında dialoq bu gün mövcuddur, davam edir və gələcəkdə də olacaq.
