Ali təhsil müəssisələrinə qəbul imtahanlarının nəticələri açıqlandıqdan sonra abituriyentlər üçün ən vacib mərhələlərdən biri olan ixtisas seçimi başlayır.
Bu dövrdə isə sosial şəbəkələrdə özünü təhsil eksperti və ya ixtisas seçimi üzrə məsləhətçi kimi təqdim edən şəxslərin sayı da artır.
Onlar müxtəlif vədlərlə abituriyent və valideynlərə xidmətlərini təklif edir, uğurlu seçim edəcəklərini iddia edirlər.
Bəs bu şəxslərə etibar etmək nə dərəcədə doğrudur? Onların həqiqətən peşəkar olub-olmadığını necə müəyyən etmək olar?
Mövzu ilə bağlı AZXEBER.COM-a danışan elm və təhsil məsələləri üzrə mütəxəssis Rəvan Əliyev bildirib ki, hər il ixtisas seçimi dövründə sosial şəbəkələrdə bu sahə üzrə özünü ekspert kimi təqdim edən şəxslərin sayının artması cəmiyyətdə müəyyən narahatlıq doğurur:
"İxtisas seçimi hər hansı texniki prosedur deyil, gəncin gələcək peşə fəaliyyətini, sosial statusunu və həyat trayektoriyasını müəyyənləşdirən mühüm qərardır. Məhz buna görə də hər il ixtisas seçimi dövründə sosial şəbəkələrdə bu sahə üzrə özünü ekspert kimi təqdim edən şəxslərin sayının artması cəmiyyətdə müəyyən narahatlıq doğurur. Hesab edirəm ki, abituriyentlər və valideynlər ilk növbədə bu sahədə xidmət göstərən şəxslərin peşəkar səriştəsini qiymətləndirməlidirlər. İxtisas seçimi yalnız keçid ballarını bilməkdən ibarət deyil".
Rəvan Əliyev qeyd edib ki, etibarlı mütəxəssisi müəyyənləşdirmək üçün bir neçə əsas meyar nəzərə alınmalıdır:
"Təəssüf ki, bəzi şəxslər özünü təhsil eksperti kimi təqdim edir, lakin onların bu sahədə nə elmi hazırlığı, nə praktik fəaliyyəti, nə də peşəkar təcrübəsi olur. Etibarlı mütəxəssisi müəyyənləşdirmək üçün bir neçə əsas meyar nəzərə alınmalıdır: onun ali təhsil sahəsində fəaliyyəti, elmi dərəcəsi, universitetlər və qəbul sistemi ilə bağlı praktik təcrübəsi, ictimai nüfuzu, əvvəlki uğurlu nəticələri və fəaliyyətinin şəffaflığı. Eyni zamanda, peşəkar məsləhətçi heç vaxt qərarı yalnız bal göstəricisinə əsasən vermir. O, abituriyentin maraqlarını, qabiliyyətini, fərdi xüsusiyyətlərini, gələcək əmək bazarının tələblərini və uzunmüddətli karyera perspektivlərini kompleks şəkildə təhlil edir".
Fəridə Əsədzadə
